法拉肩恃貴氣 膊出夏日氣息
要露肩露得出色，揀條靚裙是一大關鍵！本地著名設計師郭慶彬（Ricky）認為陳法拉與謝婷婷簡潔的裙，最能凸顯貴氣，而鍾欣桐（阿嬌）的中空裝亦見驚喜！
郭慶彬Profile：
從事時裝界多年的郭慶彬（Ricky），多擔任廣告形象指導，曾為名模樂基兒及熊黛林等設計造型，亦開設時裝店打造潮人，是娛圈中的星級形象指導。
陳法拉
7分 天生麗質
Ricky：「法拉條裙令佢嘅肩線好靚，加上佢本身手嘅線條幾吸引！不過，可能對鞋個色調同條裙個Tone唔太啱，扣咗少少分！」
鍾欣桐
8分 自然性感
Ricky：「佢條裙嘅中空設計好吸引，露到少少肉，好自然嘅性感！如果條裙個肩帶可以幼番啲，騷多啲個肩就好好多！」
趙碩之
5分 衣不稱身
Ricky：「條裙騷晒成個肩形，不過裙身唔夠貼身！短髮走型格路線，浪費咗佢獨有嘅女性美，個妝可以淡啲囉！」
陳嘉桓
6分 四正吸引
Ricky：「佢着得幾四正，特別今次單膊嘅Cutting，好發揮到佢本身嘅吸引力，可以換上短裙，感覺會高貴啲！」
謝婷婷
8分 完美示範
Ricky：「好端莊大方，條裙夠簡潔，毋須咩裝扮都好雍容、好有貴氣，完全騷到佢完美嘅肩膊同鎖骨！」
陳庭欣
3分 累贅礙眼
Ricky：「好多嘢，整體感覺好重！Tube Dress嘅層疊設計令佢本身啲身形冇晒，肩位畀髮尾遮咗，紮馬尾會大方啲！」
葉翠翠
5分 暴殄天物
Ricky：「雖然揀咗今年好Hit嘅豹紋，不過有啲老成，肩膊位畀頭髮遮住，嘥晒本身肩位個Shape！」
陳鈺芸
4分 壯臂扣分
Ricky：「Tube Dress加上長髮披肩，可惜做唔出應有嘅若隱若現效果，手臂粗咗少少，束起頭髮會好好多！」
傅穎
5分 童顏熟女
Ricky：「雖然有Deep V谷事業線，但條裙粗肩帶嘅設計，睇上去個膊頭好橫！加上條裙個Tone太成熟，同佢個童顏樣唔襯！」
郭慶彬（Ricky）
從事時裝界多年的郭慶彬（Ricky），多擔任廣告形象指導，曾為名模樂基兒及熊黛林等設計造型，亦開設時裝店打造潮人，是娛圈中的星級形象指導。