(10)李晉強起孖 出術贏港男

今屆香港先生昨晚誕生，十一位參賽者繼續玩騎呢搶分，海軍鬥水兵下，最後由(10)李晉強奪冠，雖然他口齒不清，但憑魔術才藝及大隻外形成雙料冠軍！

昨晚《2011香港先生選舉》於電視城舉行，十一位參賽者外表平均亦平凡，賽前未見有突出之選。(6)方世杰、(10)李晉強、(12)林志勇與敗部復活的A蕭家浩入圍最後四強，結果由貌似韓星池珍熙的李晉強贏得冠軍，其大舊身形亦贏得「最佳台型大獎」。來自加拿大的他在四強辯論環節時口窒窒，仍獲主持鄭裕玲力撐：「雖然唔知你講咩，但我鍾意聽你講嘢。」加上在才藝大玩魔術冧女，以文才揮低其他充滿動感的表演。

林志勇跣完照Chok

對於爆冷奪冠，李晉強直言驚喜：「做番平日嘅自己，開開心心。（講嘢唔夠大聲？）可能之前跌崩個嘴！（來港發展？）返一返加拿大先，仲有一年畢業，讀埋書先。（笑容好所以贏？）唔知，可能係啦！」

全晚最令人期待的當然是泳裝環節，一班猛男以三角泳褲盡晒結實胸肌及腹肌，貼上假紋身濕身出場，大玩引體上升及倒轉Sit Up。方世杰身形最健碩，加上似足韓星Rain的稚氣笑容，獲得不少讚賞；自信心爆棚的林志勇在鏡頭前不慎跣一跣，但仍無損其「煞氣」，全晚不停狂擺招牌甫士騷手瓜，又自誇體能強勁，令人O嘴！

必殺技環節中，十一位港男亦出盡法寶，有實力亦有騎呢。(9)舒宇表演武術大玩空翻跳躍盡顯功架；(8)鄧嘉傑則跳Breaking，以凌空倒立俘虜女嘉賓；(2)許鴻達變身莫華倫以歌劇腔唱歌，引得全場尖叫，爆冷獲得頗高票數，但最後仍不敵(3)黃建東又Rap又跳踢躂舞又唱歌，多才多藝的表演險勝「最具演藝潛能大獎」。至於賽前大熱蕭家浩則奪得網上投票的「iMR大獎」。

男司儀笑料百出

此外，全晚大玩「重口味」，出場片段中的一班港男被巨型拳套打到歪口歪鼻，至中段時又要半裸打爆不同顏色的氣球，但寓意不明，非常騎呢！無綫今年破天荒放寬限制，除了加設男評判團及男觀眾列席外，亦邀請陳奐仁任首位男司儀，雖然他甩漏不少，卻增加不少笑料。