霆鋒淡定返港栢芝緊張到嘔

明天是鋒芝婚變兩個月,也是決戰陽明山莊的日子,5年夫妻情終有個了斷!淡定的謝霆鋒連保安亦慳番,似乎成竹在胸;反觀抱恙開工的張栢芝,昨日則擔心到嘔!

鋒芝婚變後已闊別兩個月,霆鋒今日便拍畢新片《逆戰》宣傳片,而栢芝則向《河東獅吼2》劇組請假返港,如無意外,明天便是二人自婚變後首度見面!不過,霆鋒因之後要拍攝手錶廣告及做慈善工作,令只得兩天假期的栢芝被迫速戰速決,只剩明天與霆鋒面對面講數,無論撫養權或是財產分配,相信明天便會來個終極了斷!

據知,身在馬來西亞的霆鋒心急見心肝椗Lucas及Quintus,故決定乘早機返港,然後第一時間飛奔兒子的「藏身地」陽明山莊!唱片公司英皇娛樂擔心他現身機場會造成混亂,有意安排保安及保鏢護駕,但霆鋒認為不用那麼大陣仗,索性連保安都慳番,只叫同事接機,顯得氣定神閒!不過,據知他明天不會接受任何訪問,因在北京已交代一切,故對家事絕口不提。

寧波市長探班

至於身在寧波的栢芝卻要跟時間競賽,與霆鋒見面前夕,更緊張得嘔吐大作!昨日她抵達影視城時一直玩手機,並一支箭衝入拍攝場地,直至放飯時間仍未見蹤影。有工作人員指她未病愈,在酒店更一度狂嘔,但為免阻礙拍攝進度而頂硬上完成晚上的戲份。工作人員又表示未收到栢芝返港睇醫生的消息,但由於天氣翳焗,張叔平已安排薄衣羅裳給她,以免她熱溶。

現場所見,栢芝身形比在米蘭開工時更消瘦,但甫埋位即抖擻精神,投資《河2》片的新亞洲娛樂公司總裁余毓興大讚她專業:「可能感冒未清,加上早起身同天氣熱,栢芝的確有嘔過,但佢好敬業,有人問佢使唔使去醫院,但佢話只係飲水就OK。」他還否認劇組對栢芝請假有微言:「連小瀋陽都當栢芝係偶像!」並指寧波市長亦被栢芝吸引:「佢喺附近巡視,知道栢芝喺影視城開工即刻去探班,仲好開心咁同栢芝傾偈,又話好欣賞佢。」

專案組

心情緊張加上感冒未清,栢芝昨日嘔吐大作,但仍堅持開工。

滿面「傷痕」的栢芝,全程電話不離手,似緊貼寶貝仔的消息。

消瘦不少的栢芝,與工作人員聊天時終露出笑容。