超儀失影后瞞住老竇

有份角逐今屆香港電影金像獎「最佳女主角」的何超儀,最終敗給前輩劉嘉玲,她未敢將賽果告知父親賭王,亦無意生BB轉移父親視線。

賭王何鴻燊千金何超儀,昨日偕楊采妮、李妮及內地演員王剛在北京故宮出席《微笑行動中國基金二十周年北京慈善晚宴》活動,晚上再偕周麗淇等出席晚宴,原定出席晚宴的李亞鵬則因事缺席。

剛失落金像影后的超儀,笑言還未將壞消息告知父親:「我暫時仲未見到爹哋,未同佢講賽果,亦唔敢打畀佢。我諗住買定蛋糕,等爹哋顧得個蛋糕,唔記得問我。(生BB轉移視線?)暫時都唔想生,排吓期先,我不嬲有養狗,當係親生仔。照顧BB要付出好多,我冇咁偉大,亦唔想有意外嘅偉大,我驚BB多過畏高同怕蛇,或者領養啦!有得領養大人仲好,最怕聽BB講嘢,我要領養識溝通嘅。」

楊采妮避談復合

至於楊采妮則被追問與舊愛邱韶智復合的傳聞,她說:「我咁多年嚟都將感情事低調處理,我冇嘢講!我同佢未入行已經識,依家係好好嘅朋友。」而微笑行動基金會主席趙曾學韞,否認基金會與王菲及李亞鵬的「嫣然天使基金」存在競爭:「3年前知道王菲同李亞鵬嘅『嫣然』都係幫兔唇人士,我託劉嘉玲聯絡佢哋,大家係好好嘅合作夥伴,李亞鵬仲去過杭州醫院參觀。」

影視組

超儀害怕與BB相處,笑言若領養也想領養大人。

周麗淇穿上斜膊裙出席晚會,非常養眼!

楊采妮強調與舊愛邱韶智是好友。

趙曾學韞(左)與何超儀同樣為慈善出心出力。