葉念琛鎅江若琳鮑搞掂

導演葉念琛事業得意，愛情亦有新發展，有指他用短訊向江若琳噓寒問暖外，日前還與伊人豪歎鮑魚，展開強烈的追求攻勢。

導演葉念琛曾被指追求鄧麗欣，可惜最終敗給方力申，最近轉攻江若琳！據悉，他近期不時展開短訊及微博攻勢，向女方噓寒問暖，盡顯細心一面！日前，兩人還秘密約會歎蠔汁鮑魚，更不約而同將開餐照片上載微博，令秘密關係曝光！

互笠高帽

記者致電葉念琛求證，問到是否追求江若琳時，他雖例牌否認，但激讚她爽朗兼做事認真！至於歎鮑魚撐枱腳一事，葉念琛說：「一大班朋友一齊食飯咋！」記者亦向江若琳求證，問到葉念琛可有機會？她說：「我同佢識咗好耐，冇諗過呢方面嘅問題。（覺得佢點呀？）佢係一個好有才華嘅導演，好幽默風趣。」

另外，江若琳最近接拍愛情電影《結婚那件事》，夥拍馬來西亞歌手阿牛，為配合角色會把頭髮剪短！她坦言一直希望剪頭髮，但公司不批准，如今終如願以償：「剪咗感覺好好，覺得好似新開始，剪走晒啲衰嘢，洗頭都方便啲。」