章小蕙護女撐妹急返港

鍾鎮濤（阿B）女友范姜素貞（複姓范姜）前日因與前妻章小蕙妹妹章小婉爭執被捕，有傳事件與「B女」鍾嘉晴面腫兼流牙血有關，外婆周婉筠昨日坦言憂心，而親母章小蕙亦緊張地火速返港護愛女！

章小蕙與阿B育有一子一女，離婚後其女兒嘉晴（Tinka）跟阿B及其同居女友范姜同住，兒子嘉浚則跟媽咪到美國生活，並在當地升學。早前章小蕙妹妹章小婉聲稱得知姨甥突然面腫兼流牙血，非常擔心，但因無法接觸Tinka，遂向其學校老師查詢，據知事件已轉交社工跟進，亦已通知Tinka監護人（即阿B夫婦）。前日范姜與鄰居章小婉冤家路窄，發生口角後，章小婉因手機被掟爛而報警，范姜被捕，並獲准以一千元保釋。事件愈鬧愈大，原定月中才返港的章小蕙決定更改行程，立即放下工作飛返港護女及撐妹，昨日記者致電章小蕙美國電話，一名外籍男子接聽並表示她已出國，但不知其去向。記者再致電其香港手機，前日關機的手機，昨日已通但無人接聽，估計章小蕙已返港。

其後記者致電章小婉，她最初禮貌地受訪，但談到姊姊章小蕙為家事火速返港，她煞有介事並匆匆收線。

（記：記者　章：章小婉）

記：你同范姜當時爭執乜嘢？

章：我依家乜都唔講得，我返緊工，已經交晒畀警方同律師處理。

記：你係咪好嬲？

章：等律師處理。

記：有冇聯絡章小蕙？

章：我趕緊文件唔方便講。

記：你知唔知兩個姨甥嘉浚同嘉晴喺Facebook留言話你多事？

章：（無奈地嘆氣）唉！我唔回應啦！細路仔嘅嘢唔好咁咩……

記：即係唔好咁認真？

章：咁又唔係……我唔知，我好忙！

記：章小蕙係咪為咗呢件事即刻返香港？

章：……唔知！

章母憂心　章父避談

對於有傳外孫女面腫兼流牙血及女兒與人發生爭執，年事已高的章媽媽坦言相當擔心，昨日她接受電話訪問時說：「我對呢件事好憂心，由於事件已交警方處理，唔方便講咁多，我相信警方會搵出真相！」至於章小蕙父親章建國最初表示不知情，要向女兒查問，但不久便致電回覆：「我暫時未聯絡到章小蕙，而章小婉件事已交警方處理，我不便回應！」另外，本報昨日致電嘉晴所屬中學查詢，校務處職員要求記者留下電話，但至截稿前仍未回覆。