曹蕙蘭「家族遺傳」考車牌兩Take OK
港姐曹敏莉妹妹曹蕙蘭數月前考車牌路試肥佬，日前她在沙田駕駛學院補鐘個半小時，再應考！雖然成績單列出九項輕微錯處，但她最後成功考取駕駛執照，興奮得高舉勝利手勢，又與教車師傅握手合照！
曹蕙蘭透露家人全都是兩次Pass，笑言如今次再衰會冇面見鄉親父老：「媽咪講笑話衰咗唔好返去見佢，師傅就話我流住車手血，但要我減慢速度。啱啱揸到最尾都暈暈哋，手軟腳軟視線模糊，太緊張喇！」雖然考牌成功，但她暫不考慮買車：「會揸屋企人架車先，以後屋企人飲咗酒，我都可以做佢哋嘅『柴可夫』！」
終於Pass，曹蕙蘭興奮到彈起！
曹蕙蘭考獲車牌，最開心是可以夜晚播住歌於公路上馳騁。