法拉靠自己儲錢開舖

陳法拉昨日出席《Pizza Hut X 名廚Ricky星級Pasta Show》一展廚藝，與名廚張錦祥（Ricky）合力炮製Pasta。

法拉坦言想過由公仔箱進軍飲食業：「平時我都有煮嘢食，最拿手煮Pasta同紅燒牛肉麵。（煮心形牛扒博男友薛世恒讚？）咁又唔使心形牛扒咁複雜，好多朋友試過我手勢都有讚，我有諗過投資開西餐廳，不過依家好忙，或者等我再儲多啲錢先。（搵男友夾份？）唔會！工作要分開，何況牽涉到錢銀，呢樣係互相尊重，細個阿媽已經教做女人要經濟獨立。（男友有冇畀家用？）唔興咁做，咁都好，等我有目標同工作動力。（你會做人老婆先定做老闆先？）我唔識答！」

陳法拉穿上Tube Dress煮Pasta，大顯身手。