陳豪新歡勝舊愛 媺飛色舞

被廖碧兒狠撇受盡情傷的陳豪，近日被指與陳茵媺譜出「媺陳戀」，但陳豪未有極力否認新戀情，昨日更嘴角含春，坦言現時心情比之前好，更指現在是遲來的春天！

昨日陳豪、名模熊黛林及諸葛梓岐齊齊行騷，陳豪明顯心情甚佳，相對之前被廖碧兒狠撇時一臉落寞，簡直判若兩人。傳與陳茵媺拍拖的陳豪，被問到是否晒命？他說：「冇，開心係因為有劇出。（有女友開心過有劇出？）真係冇，心情係好咗，可能多時間休息同拍廣告登台，搵錢係開心。」

問到這個春天是否特別開心？陳豪冧笑說：「遲來的春天！（呢個春天好過之前嗰個春天？）總之依家開心！（會將呢份開心同某人分享？）你話邊個？唔知你講邊個！（陳茵媺！）OK嘅。（睇樓係想搬離傷心地？）唔好咁講，不嬲都有投資打算，我相信磚頭，唔會賣舊居，我幾保守。」對於廖碧兒指他們傳出戀情不感意外，陳豪笑說：「唔回應，唔該晒！」

徐靖雯轉軚冧豪

此外，穿上低胸連身裙的諸葛梓岐，自爆被母親投訴：「今朝先同媽咪嘈咗一輪，佢話啲衫愈來愈誇張！（未來奶奶有意見？）冇。（婚前盡地一煲？）唔會，三點式同睡衣應該喺屋企着，唔會益街坊。」對於張智霖指入行後幸運地賺到一個家，熊黛林被問到會否有共鳴時，她說：「始終大個女都會拍拖，唔關係咪入行事，都想早啲有家庭，始終成日飄來飄去，冇自己屋企咁。」

另一邊廂，鄭嘉穎緋聞名模女友徐靖雯，昨日到新太陽廣場出席《新地鼻煙壺珍藏展》。對於有人將陳豪及鄭嘉穎比較，她笑說：「我也喜歡陳豪，看他事業好好，為人處事一定有過人的地方。」