成龍爆「雙偉」吵大鑊

成龍昨日接受電台訪問時,踢爆曾志偉與劉偉強一度因賑災錄音安排而吵大鑊,志偉直認雙方「拗慣拗熟」:「大家意見唔同,有爭拗難免!」

成龍(大哥)近日忙於籌備今晚假維園舉行的《愛心無國界311燭光晚會》,對於早前突傳死訊,大哥昨日親身到電台接受查小欣節目訪問,以正視聽:「原本打算搞一個中、日、韓、港、台、澳跨地區嘅慈善活動,原意係幫北韓,不過籌備上有問題,加上日本大地震,就轉化成一個賑災騷,希望以悼念嘅方式進行!」他又踢爆曾志偉與著名導演劉偉強因為安排歌手錄音一事「吵大鑊」:「前幾日劉偉強同志偉為首歌嗌晒交,一時又話個Key唔啱,一時又話點解呢個藝人企呢度、唱邊句咁,不過好快冇事喇!」問到晚會將會「包底」多少錢?他說:「幾多錢就唔好講喇!不過為咗今次賑災晚會停工兩個星期,呢個損失仲大啦!」

誤傳死訊搞喊老友

談到早前被拍到激咀徐靜蕾,大哥說:「當晚楊受成、張靜初同埋趙本山都在場,徐靜蕾搵我係因為想搵房祖名拍戲,呢種新聞我都睇慣喇!唔使次次去回應!(傳死訊?)我嗰日收到幾千個電話,陳自強仲喊住打畀我,唔係第一次傳啦!」

至於志偉昨日綵排晚會時坦承中曾與劉偉強鬧交:「大家意見唔同,有爭拗係難免嘅!不過拗慣拗熟,我哋唔會有芥蒂!」而劉偉強亦透過電話訪問表示開會爭拗是正常事,與志偉並無意見不合。

音樂組

大哥踢爆志偉與劉偉強在會議室上演一幕「鐵雞鬥蜈蚣」,幸爭拗很快便平息。(設計圖片及對白)

志偉坦承與劉導意見不合,但絕無心存芥蒂。

成龍親身接受查小欣節目訪問,為死訊闢謠。

志偉(右起)、鄭裕玲及張艾嘉齊齊任賑災晚會司儀。