廖碧兒：唔關我事!

廖碧兒狠撇陳豪轉投富二代林忠豪懷抱，雖然舊愛陳豪自爆曾如林峯般與女友拍攝親密照，不過，廖碧兒卻斬釘截鐵說：「冇影呀！唔關我事！」

文、攝：追蹤組

廖碧兒被踢爆與富二代林忠豪相戀後，即跟傳拍拖六年的陳豪劃清界線，每次提到陳豪，她更以「人哋」來稱呼舊愛。這對舊情人日前各自搵食，沒有工作在身的廖碧兒與家姐於大前日往中環歎茶時，提到陳豪即走夾唔抖。

當日下午約四時，戴上黑超的廖碧兒，與腹大便便的家姐，雙雙前往中環的餐廳歎茶，心情靚的廖碧兒與家姐有講有笑，又拿出電腦上網選購嬰兒手推車，廖碧兒意見多多，手舞足蹈，極為興奮，逗留約一小時才埋單離開。廖碧兒步出餐廳時，甫見記者拍照即笑笑口打招呼，問到有否留意林峯與舊愛潘霜霜的床照及激咀照相繼曝光？她說：「唔知呀！因為我家姐就嚟生，我日日都陪住家姐，冇睇雜誌。」提到舊愛陳豪坦言與過往女朋友也拍過親密照，問她有否影過？她即斬釘截鐵說：「冇影呀！呢啲係佢講，唔關我事！」說罷便與家姐匆匆走人前往乘車。

一支公扁嘴

至於陳豪日前則獨自現身中環超市，在店內左揀右揀，未幾已掃下大堆食物排隊付款，原本扁嘴兼木無表情的他，見記者拍照即四萬咁口，並透露剛在附近工作，順便掃貨：「買咗啲食物同家居用品囉！」其後便乘的士走人。