林夏薇解除峯號靠實力彈起

古有孔明借東風火燒連環船，近期有女星借「峯」上位，林夏薇挾「林峯堂妹」之名在娛樂圈彈起，但愛演戲的她揚言不靠林峯庇蔭，以實力實現夢想。

文︰藍裕彤 攝︰謝國華

現年23歲的林夏薇靠「林峯堂妹」的稱號，人氣勁升，熱爆網絡，雖然事業順利，但被指借「峯」上位，無疑令她承受不少壓力，她說︰「梗係有啦！因為佢（林峯）又咁好，壓力會好大，對自己嘅要求自然會高啲。但就算出面嘅人唔畀壓力我，我係嗰啲自己畀壓力自己嘅人，正因為呢種壓力，會令我要做得更加好，更加進步。（擔心被人比較炒作新聞？）唔會，每個人特色唔同，人哋要拎嚟比較我都冇用，惟有自己做好啲。」但她不願靠「峯」庇蔭，坦言入行後要靠自己︰「我都希望有新嘅稱號，始終依家呢個稱號係有壓力，我都想其他人睇到我嘅努力！」

抗拒與男友影床照

最近林峯與內地性感女星潘霜霜的床照流出，成為全城熱話，對於堂兄一連串負面新聞，薇薇十分關心對方︰「我有打畀堂阿哥慰問，希望佢唔好畀呢件事影響到，想件事快啲結束。」問到會否與男友拍攝床照？她十分堅決地說︰「唔會！自己尺度比較保守，同男友一定唔會影得好親密，普通嘅合照就會有。」

紅爆網絡後，薇薇跳出舞台進身廣告界，早前首次為恒生後人何乃斌太太何倍倩經營的護膚品牌ZENSATION拍攝廣告硬照，她開心地說︰「老闆娘好Nice，大家會一齊交流護膚心得。開始拍嗰時有啲緊張，因為之前喺內地拍過廣告，抱實習態度。」薇薇坦言效果滿意，問到會否覺得因得到堂兄的庇蔭而有拍廣告的機會？她說︰「可能囉！但自己冇特別去諗，只會珍惜機會，做到最好。」

與堂兄談情難忍笑

而薇薇希望日後會有更多嘗試，無論演舞台劇、拍廣告或電視、電影，做個多棲演員︰「做舞台劇係一個好好鍛煉嘅機會，我都想之後有唔同嘗試，有機會嚟緊係要把握啦！」問到會否想與林峯合作？她愕然地說︰「吓？哈哈，冇諗過，係都幾好喎！會有特別嘅感覺。（演情侶呢？）我怕會忍唔住笑喎！但做嘢OK嘅。」

每人的童年都寫過一篇《我的志願》，雖然薇薇自小有表演欲，但當演員並不是她當初的夢想︰「我細個嗰時覺得做律師好型，但又想做護士同空姐，因為自己鍾意咁多職業，就諗不如去做演員啦！可以一次過滿足晒。」其後，薇薇隻身走上北京修讀北京戲劇學院，經過不停磨練，令她對演戲的熱誠更加濃厚，變成「戲癡」，她說︰「我無時無刻都會去諗有關演技嘅嘢，仲會喺屋企做戲，其實都覺得幾奇怪o架！試過好唔開心喊嘅時候，都會特登走去拎塊鏡望自己喊緊好唔開心個樣，去記住呢個表情。」

恨與偶像曼玉合作

薇薇演出經驗豐富，但返港後加入香港話劇團，起初有點不習慣，她說︰「之前喺北京讀書，假期會返香港，但兩地文化唔同，語言同台詞都有分別，要慢慢適應。」在話劇團已有一年多時間，薇薇漸成為團中重要一員，參演多部舞台劇，而她最想跟偶像張曼玉做對手戲︰「我好想同張曼玉合作，因為我好鍾意佢做戲。男星我會揀韓國嘅Rain，佢好型，有舞台嗰種征服感，喺台上好有自信，演員有自信係好重要。」

感情方面，樣子標致的薇薇身邊不乏男性友人，但事業心重的她對愛情愛理不理，仍是單身的她坦言並不着急︰「自己性格開朗，好多時畀人一種男仔頭嘅感覺，所以身邊都有好多男性朋友，但自己事業行先，唔會特別去諗愛情，我係一個信緣分嘅人。」她坦言擇偶條件沒有太大要求︰「冇乜特別要求，講感覺，當然有靚仔梗係好啦！」至於身邊有否男士追求？薇薇坦言未有為意︰「冇留意喎！自己唔清楚，可能有啩！都係做嘢先啦！」看來一班追求薇薇的男士要加把勁呢！