阿Sa Baby鬥晒幸福

陳偉霆的新歡舊愛蔡卓妍（阿Sa）及Angelababy，前晚於品牌派對上首次碰頭，她們口口聲聲說毋須避忌，但場內合照時竟然刻意搵周柏豪與陳奕迅做夾心人，認真口不對心。

陳奕迅、周柏豪、蔡卓妍、Angelababy、傅穎及雷凱欣等前晚以代言人身份出席海港城主辦的adidas派對，Baby與阿Sa先後跟陳偉霆（William）拍過拖，新歡舊愛首次同場。首先出現的Baby說：「我同阿Sa係第一次同場，唔會尷尬，大家都係為工作啫！（合照？）我冇所謂，唔知大會會唔會安排，唔會特登去避，人要向前望！」不過Baby率先「斬纜」稱沒空欣賞William主演的電影《出軌的女人》，但甜笑承認跟男友黃曉明一齊去旅行見法王，問她是否公開關係？她笑而不答兼拉開話題，高調大晒幸福。

阿Sa跟林俊傑隨後到場，她說：「合照冇問題，最緊要大家開心！」身為正印「霆嫂」的阿Sa坦言會力撐William的新戲，提到戲中他跟多個女人的激烈床戲，她說：「我已經學識隻眼開、隻眼閉。（係咪冇眼睇？）唔係，一隻眼合埋、一隻眼瞇埋囉！」她表示不會亂呷醋影響工作，無疑是為「陳蔡戀」打強心針。

全程零交流

雖然兩人聲稱不尷尬，但派對內卻全程零交流，當大會要求幾位代言人合照時，阿Sa跟Baby刻意叫柏豪跟Eason坐中間，避開尷尬場面。而William前晚出席主演電影《出軌的女人》首映禮時，坦言打算再找機會跟阿Sa拍拖睇戲，提到林峯被舊愛潘霜霜爆料，他力撐林峯說：「我覺得個女仔好唔啱。（內地引誘大﹖）自己就唔怕，我有穩陣嘅愛情。」

文：音樂組　攝：鄭家俊