吳國敬笑寸：時間啱啱好

許志安公開承認跟鄭秀文復合，其老友BIG FOUR齊聲叫好，身在北京的張衞健在電話中說：「祝佢哋幸福快樂，咁多年之後仲可以有愛，係主嘅恩典。」他還打趣說以後約安仔打波，可能要跟Sammi搶人。對於安仔被指借女友宣傳個唱，健仔力撐：「呢啲嘢寫咗咁多年，冇計，呢個時間不避嫌疑講最好，見到安仔嘅勇敢、承擔。」梁漢文亦說：「我哋四個冇問對方感情事，作為朋友衷心祝福。（宣傳？）唔喺記者會講，又喺邊度講？宣傳不如整首合唱歌先。」蘇永康亦說：「真係唔知佢哋拍拖，BIG FOUR好少講感情事。（點睇佢哋復合？）比一個財政預算同施政報告更加順應民意，戥佢哋開心。」

而好友吳國敬則說：「恭喜晒！兜兜轉轉都係呢件，甜到漏！（有指安仔借Sammi谷個唱？）正常啦！你開演唱會有呢啲舉動，全世界都會話，但作為朋友唔係咁諗，要例牌否認，把口話冇理由，但真心嗰句係：『唔係宣傳嘅宣傳真係正！』一舉幾得，恭喜有情人終成眷屬，祝安仔加場，兩全其美，時間啱啱好，甘拜下風。」他大爆上周跟Sammi、陳奕迅、蘇永康和車婉婉上何超儀家中BBQ，當晚安仔不在場，但Sammi春風滿面。