呢頭話低調 嗰頭騎騎笑

安仔昨日率先在查小欣的電台訪問中承認與Sammi復合，雖然他屢次強調想愛得低調，但卻接連在訪問及個唱記者會上高調宣布翻撻，認真弔詭！

查小欣：畀人影到兩個一齊切豬髀喎？

許志安：嗰次食飯，其實都想趁呢個機會……

查小欣：做乜呀？復合呀？

許志安：唔好用呢個字，只係覺得應該同關心我哋嘅人有啲交代，我哋有個共識，想正式嘗試吓可唔可以喺番埋一齊。畢竟隔咗咁耐，想好似平常人咁，睇吓可唔可以一齊，所以希望低調處理。

查小欣：邊個行出呢一步？

許志安：分開咁耐，始終性格會變，好多事都唔同咗，唔知日後會點，希望可以有將來啦！

查小欣：老友反應如何？

許志安：佢哋唔知，我不嬲喺呢方面都低調少少，我都覺得應該要畀佢哋知，不過食飯嘅報道太突然，又唔係一件咩唔好嘅事，所以借個機會向關心我哋嘅人交代。

查小欣：之前訪問過Sammi，佢話以前唔識珍惜同好任性，咁依家點？

許志安：佢改咗好多，不過你咁問又好尷尬。

查小欣：由朋友到拍拖，點樣去踏出嗰一步？

許志安：好自然，其實感情事大家都會有種剎那間嘅感覺，會自自然然咁出現。

查小欣：之前有傳安仔你唔想公開住係因為你費事畀人話宣傳？

許志安：熟悉我性格嘅就知我唔係呢一種人，我問心無愧、瞓得着就得，而且我相信冇人會用一段真實感情嚟做宣傳，咁樣係侮辱愛情兩個字。

查小欣：咁快快趣結婚啦！

許志安：我哋只係啱啱嘗試開始啫，講得太遠喇！