安仔冇諗娶Sammi齋翻啅

現年38歲的鄭秀文（Sammi），成功翻撻舊愛許志安！安仔昨日在演唱會記者會上「借機」公布復合喜訊，但被問到是否認定Sammi是終身伴侶時？安仔繼續採取「拖」字訣：「冇諗咁長遠！」

現年43歲的許志安，自去年7月高調宣布與拍拖3年的余德琳（Michelle）分手後，埋下「翻啅」Sammi的伏線，加上二人上周被踢爆雙雙歎燒豬髀，令復合消息甚囂塵上！雖然Sammi一直避談翻撻，但最近正值演唱會宣傳期的安仔，昨日一反常態，上午接受完查小欣電話訪問後，下午又在公開活動上大方承認二人「嘗試開始一齊重新認識」高調宣布復合，難免令人覺得他借緋聞宣傳。

聞生仔O晒嘴

安仔昨日出席宣傳活動，好友蘇永康、張衞健、梁漢文及楊千嬅則錄影短片祝賀，獨欠Sammi送祝福。被問到與Sammi復合及被取笑《唯獨你是不可取替》是其心聲時，安仔「甜到漏」地說：「我同Sammi自從食完嗰餐飯之後，大家有共識，既然呢個係事實，應該將件事講畀朋友知！其實拍拖係好普通嘅事，我哋嘗試開始一齊重新認識。（幾時開始？）啱啱！」

Sammi一直自比「Dry過沙漠」，屢次表明恨結婚恨到發燒，最近更有傳他倆將於八月到法國「閃婚」，安仔聞訊坦言「嚇咗一跳」，但仍「四萬咁口」的說：「邊度？我唔知？嚇咗一跳！希望大家畀多啲空間我哋嘗試喺埋一齊，重新開始。（認定對方係一世伴侶？）冇諗咁長遠，總之個心好平安。（係咪有初戀感覺？）哈哈！答你唔到！（趕生仔？）咁問我『O晒嘴』，好奇怪！」

勸舊愛向前望

雖然有傳高調撇甩Michelle後才狂追Sammi，但安仔昨日表示他倆在自然情況下發展，並沒刻意打動對方：「好正常發展，憑感覺，冇話邊個追邊個！大家好Natural，希望畀空間大家，低調少少！（係咪喺廚房示愛？）畀啲空間我哋啦！（有傳你送999支玫瑰喎！）冇送，但傳聞嘅嘢唔可以逐一去答！」他又否認是張衞健教路追Sammi，更直言是次翻撻瞞晒所「友」人。

對於一直被指借戀情宣傳，適逢今次又巧合地在宣傳期公布復合，難免令人諸多揣測，安仔說：「呢方面我睇得好開，相信冇人會將一段真嘅感情攞嚟做宣傳，如果係就侮辱咗『愛情』呢兩個字。（好啱喎？）要嚟冇得去計，呢啲我唔理人點睇，隨自己個心！」再被追問時間太巧合，他則沒有回答。

此外，有傳舊愛Michelle家人擔心她患上抑鬱症？安仔煞有介事地說：「人要向前望，以前嘅嘢唔好再提，佢係圈外人，唔好打擾佢。」而另一舊愛兼前助手細佬則在電話中表示不知道二人復合，但仍送上祝福。