姚煒嘆「佢變化好大」周美鳳讚義氣仔女

羅兆輝猝死，不少社交界好友細訴當年與他的相處點滴，周美鳳說：「佢好有義氣，係俠義嘅人，記得嗰陣我搞Ball，佢都幫我認購咗兩張枱，但嗰陣佢已經唔掂，之後佢畀咗錢，但同我講唔會到，叫我畀朋友，如果後來佢唔掂時，我撞到佢，一定會畀番錢佢。最後一次見佢喺佢艘遊艇上，佢請我上去打邊爐，當時佢環境已經唔好，上到去佢全身濕晒坐喺度，我問佢做乜，佢話佢啱啱跑完步，不停標汗，好奇怪！」

司馬燕說：「佢細我一年，我當佢係細佬，嗰陣我搞Party，佢都冇托手(月爭)，幫我買枱。我哋最後一次見面，係佢嚟加拿大搵我滑雪，當時佢已經有個毒瘡，而且個人渾渾噩噩；其實佢好叻仔，但有啲嘢真係整定，而且以前佢又自殺過，都預咗。」姚煒則說：「我好耐冇見佢喇！以前佢正常風光時都成日見佢，聽到佢死訊覺得好突然，佢仲好後生，但佢起伏變化好大，後期已經好少聽到佢嘅消息。佢係叻仔、醒目仔，其實人受到挫折唔可以勇敢企番起身，個下場都會估到；成功已經唔容易，但維繫成功就更加難，如果失敗後能夠企到起身就係真正嘅成功。」