鋒芝帶Lucas過大海倒數

張栢芝與謝霆鋒分頭到內地拍戲，搵銀過肥年，昨日「鋒芝」趁新年帶大仔Lucas到澳門迎接新一年，順道一家享天倫樂！

張栢芝和謝霆鋒早前先後因拍戲而受傷，但經過休息後已無大礙。昨日鋒芝更帶Lucas出外遊玩慶祝除夕及新年。昨午，他們先由赤柱寓所坐車到拉姑家，將細仔Quintus交予拉姑照料。一切安頓後，三人登上七人車離開，旋即開始帶記者「遊花園」，又多次折返拉姑寓所，之後他們還轉乘拉姑的七人車離開，並前往深灣遊艇會的停車場內欲撇甩記者。

帶記者遊花園

未幾，孭着奶粉袋、頭戴印有Lucas字樣Cap帽、打扮輕便的霆鋒先行下車，為架上太陽眼鏡、手抱熟睡的Lucas、左手戴鑽戒的栢芝開車門，細心體貼！當記者上前追問是否出埠賀新年時，霆鋒只不停向記者邊祝賀：「新年快樂！」邊步往搭升降機離開。

其後，有讀者目擊鋒芝一家現身澳門，相信他們帶Lucas到澳門的《迪士尼冰上世界奇幻之旅》玩樂，過一個難忘的除夕夜。