李彩華開派對做咪霸
自言愛搞派對的李彩華（Rain），早前與親朋好友慶祝27歲生日，她表示人愈大，愈珍惜與家人及好友相聚的時間。Rain透露生日前夕，先與家人歎日本菜慶祝，然後轉場到卡拉OK，與數十名朋友慶生辰，她說：「歎日本菜就係屋企人請，我好享受家庭樂，之後就同大班朋友去唱K，班朋友好有心思，將K場布置得好靚，有氣球同我至愛嘅Hello Kitty公仔，真係好難得成班朋友出席，一Call即到，大部分都係圈外朋友，似Gathering多過似慶祝生日。」
Rain不諱言當晚歌癮大發，問到是否唱自己的歌？她說：「梗係唔會啦！主要唱英文歌同黎明啲歌，我係『咪霸』。（係咪鍾意開P？）都鍾意o架！但唔使搞咁多，要物以罕為貴，有喜慶嘢先搞。（做搞手？）唔會啦！通常做出席嗰個。」問到收了甚麼生日禮物？她雀躍地說：「有大利是、新型電腦同iPad，我鍾意實際啲嘅禮物。」
李彩華與巫翊鳴（左）及楊哲寧非常老友。
李彩華與家人包括胞弟李健中（左）歎日本菜慶生辰。