唐詩詠放低「雙」痛攀高峰

唐詩詠活躍公仔箱多年，今年有份角逐台慶兩個獎項，《鐵馬尋橋》不僅令她人氣急升，更為她洗滌心靈。去年經歷喪母及失戀的傷痛，她走出低潮後成熟不少；目前努力攀上事業高峰！

入行近7年的唐詩詠，今年憑三齣劇集提名明晚無綫台慶頒獎禮的「飛躍進步女藝員」獎項，又憑飾演《鐵馬尋橋》的「雁鳴」首次入圍「最佳女配角」。詩詠坦言《鐵》劇為她帶來最大的心靈滿足：「自己好鍾意呢齣劇，一嚟劇本好，二嚟角色有得發揮，我之前比較少演悲劇角色，要揣摩，最後放膽去做，估唔到出嚟觀眾反應咁好，可能新鮮感大啦！」演員前輩常掛在嘴邊的「享受角色」，她拍《鐵》劇時完全體會到。詩詠承認入行第二、三年曾失去演戲感覺，一度陷入迷惘期：「嗰時做來做去都係差唔多類型嘅角色，我會諗究竟係我嘅演技Fix死咗自己可以演嘅角色，定係人哋Fix死我呢？」今年在三齣劇中扮演截然不同的角色，她既珍惜又感激。雖然不是一線花旦，但詩詠毫不介意：「我覺得有時係需要天時地利人和，總之依家做好自己本分就得，我好佩服阿佘（佘詩曼）嘅精神同毅力。」

滿足感最重要

談及獎項，她說：「啱啱入行嗰時的確覺得有獎先係肯定，但呢兩年心態變咗，特別係拍咗《鐵》劇之後，獎項固然係對自己嘅肯定，攞到係錦上添花，但冇我都唔會失落，我最着重嘅係拍劇得來嘅滿足感。」女配角競爭對手強勁，詩詠不敢覬覦：「同小紅姐（惠英紅）冇得爭啦！佢係多屆影后，演技毋庸置疑，同佢一齊提名已經好榮幸。」她自覺第二年提名「飛躍進步」，信心亦大些！

早前陳志雲回朝，被列為愛將的詩詠感到開心，她說：「唔好分咩將咩將，Stephen（陳志雲）好好人，向來都一視同仁，佢返嚟當然開心，能夠再一齊共事係好事！」

經歷人生低潮

今年工作上略有小成，詩詠固然高興，回首去年經歷喪母及分手之痛，她坦言是人生最低潮：「其實當時只可以靠自己將所有嘢放低晒，走出谷底。呢個經歷令我長大，學識放低唔好嘅嘢，學識寬恕，大家無論遇到咩潮都好，最緊要有個心態，就係路一定有得行！」詩詠唯一不能放下的，是母親的離開：「媽媽嘅事，冇一個Timing我係可以放低晒，我哋關係始終太密切。」

忘憂有不同方法，有人會選擇夜夜笙歌逃避現實，詩詠則選擇「收埋」自己消化哀傷、又或嚎哭發洩：「嗰排唔想接觸人，我需要一個寧靜空間去諗嘢，步出悲傷，其實冇人幫到我，自己先可以！當然朋友喺身邊好緊要，SMS嘅鼓勵說話畀力量我去發洩，喊過發洩過，我會搵朋友叉番啲正能量。」共度患難，令她更珍惜身邊好友。舊愛崔建邦（Amigo）是否在名單之上？她說：「身邊嘅相識都係超過六年，好難得冇血脈關係嘅會有咁多年，而且大部分都相識微時，冇利益衝突冇鬥爭，要好好珍惜曾經幫助自己嘅人。」去年詩詠為母親喪禮頻撲，Amigo全程傍住，她頓了一下才說：「佢冇離開過，好感激佢喺嗰段時期所做嘅嘢。」

懶理閒言護邦

去年底，Amigo撻着《打出十人巷》的參賽者中巴（鄺敏慧），與詩詠終告分手，但兩人的名字藕雖斷絲還連，及後Amigo在涉打中巴事件中受盡批評，她依然力撐對方。被指對昔日愛侶死心塌地，愛得傻、愛得蠢，敏感的詩詠說：「做朋友冇分蠢唔蠢，佢嘅感情生活唔關我事，唔會影響我心情。好多人會戥我唔抵，認為我應該用鬧嘅態度對佢，我唔想亦都唔需要去解釋自己嘅做法，總之我已經放低咗，而且唔係呢一年嘅事。我諗放唔低嘅係大家（觀眾、傳媒），唔係我。可能我係單身，社會將我哋嘅名字拉埋一齊，我哋關係太入腦，有時都解釋唔到咁多。」對Amigo，詩詠始終處處維護：「同佢唔需要劃清界線，咁會公平啲，對佢、對我都係。」

對婚姻冇幻想

Amigo已成過去式，詩詠最新緋聞對象是靚靚仔仔的黃嘉樂，老土講句「空穴來風，未必無因」，究竟兩人孰真孰假？詩詠沒好氣地說：「以前我都認為『未必無因』，但依家發覺真係『可以無因』，之前係因為我架車攞咗去整，佢車我返公司，咁就傳我哋有嘢。」兩人清者自清，依然Friend過打Band：「大家知道咩事，我哋熟到唔介意有緋聞，之前《鐵馬》一家人出來，林子善仲笑話下次要車我，同佢傳吓！」

閨中密友梁靖琪（Toby）快榮升阿太，詩詠大叫「好幸福」：「佢已經得到最好嘅嘢，就係幸福，送咩結婚禮物已經唔重要，物質嘅嘢佢亦唔愁，最重要珍惜大家嘅友情，佢要咩幫忙我都會幫！」好友有着落，快三字頭的詩詠卻表示未諗拍拖，對結婚亦無憧憬，她說：「依家最緊要工作，冇呢方面嘅幻想，大咗難拍拖，諗嘢複雜咗，太忙好易忽略身邊嘅人。」不過詩詠沒有為自己築起圍牆，自言感覺大過天的她大笑指隨時閃電結婚！