華哥杯葛頒獎禮拉隊No Show

黃日華早前因《刑警》遭冷待而怒轟無綫，慶爆的他更揚言明晚的頒獎禮亦「唔畀面玩No Show」，而監製唐基明亦表明會加入「杯葛行動」！

全城矚目的台慶頒獎禮明晚在電視城舉行，憑台慶劇《刑警》角逐視帝及視后的黃日華及宣萱，繼台慶後再度在頒獎禮「隱形」！至於《刑》劇監製唐基明昨日更不諱言無綫並沒邀他出席，深感屈辱的他遂拉大隊No Show：「人哋都玩晒啦！淨係定11月28號截止投票已經唔公平，《刑》劇12月10號先播結局，影響拉票機會，我知有人受委屈，亦戥胡定欣不值，佢做得好好！」而胡定欣昨日則在微博澄清留言大呻不公平純屬私事，與獎項無關。

三哥開工難度期

雖然無綫事後已安撫「噴火華」，但華哥坦言不稀罕獲安排躋身視帝五強及任頒獎禮嘉賓，他昨日透過助手回覆：「華哥應該唔去喇！（華哥喺香港嗎？）喺香港！（兼任頒獎嘉賓？）無綫係有呢個安排，但華哥當時未落實去唔去！」至於三哥為撐好兄弟，亦作出無聲抗議：「無綫有請我出席，但我要開外景度唔到期！（出席頒獎禮？）未知！」而在外地工作的宣萱亦鐵定「冇影」：「無綫有邀請我出席，不過因為我有嘢做，唔喺香港去唔到！（件事愈搞愈大？）唔怕，佢哋一定有佢哋嘅原因，咁要問番佢哋！」

未落實頒獎嘉賓

對於華哥與《刑》劇組玩No Show，台慶監製衞世輝說：「頒獎禮由另外一組做，我唔可以為呢方面講嘢！（三哥同華哥唔出席頒獎禮係因台慶『隱形』引發？）最好問番佢哋，據知有請佢哋做頒獎禮嘉賓！」而頒獎禮監製凌雪娥則說：「藝員部未交落實演員出席名單畀我！（華哥做頒獎嘉賓？）仲傾緊，都未定邊個嘉賓頒邊個獎嘅！」