A. Lin縮字訣：惟有硬食

梁漢文（Edmond）及A. Lin昨日出席《味之天下》活動，曾主持《美女廚房》的Edmond下廚時雞手鴨腳，場面搞笑！至於試食嘉賓A. Lin雖收起性感，但星級廚師甄文達仍大施冧功，親手餵伊人吃牛肉粒時溫柔地說：「合埋眼，擘大口！」之後又不怕口水尾，將A. Lin食剩的牛肉粒「K.O.」，更作狀親吻她！全程被搭膊攬腰的A. Lin，惟有使出「縮字訣」，在甄文達準備拿紙巾為她抹嘴前，已先行掏紙巾自抹，但對方最後亦有用紙巾代她抹嘴，令A. Lin十分尷尬！

認唔慣 有啲驚

事後A. Lin說：「可能佢比較荷里活，親切啲啫！佢好有趣，應該見我後生同我玩啫！（個個都可以咁玩你？）唔係，唔可以，惟有硬食！（嚇親？）少少唔慣，有啲驚！」

至於剛與太太外遊返港的Edmond，不知方力申與鄧麗欣（Stephy）同遊馬爾代夫，令戀情浮面：「佢兩個去旅行都好正常啫！（佢哋拍拖？）唔知呀！（叫佢哋快啲公開？）每個藝人都有自己處理愛情事嘅一套，自己決定啦！」提到二人未有否認外遊時同床，他說：「咁要問番佢哋，如果佢哋真係拍拖，我會送上祝福，不過唔會催婚！」