阿Sa唔想分身家 阿嬌：有So喎！

Twins前晚再次合體在澳門開騷，二人爆衫又甩假髮，蝦碌連場！鍾欣桐得知離婚法例能分對方一半身家，即向蔡卓妍大呼「有So」，令她尷尬失笑！

前晚《Twins人人彈起2010演唱會》在澳門演出1場，Twins勁舞連場，鍾欣桐（阿嬌）更跳到險飛甩假髮，當髮型師上台「救髮」之際，在旁的蔡卓妍（阿Sa）亦舉高手說「爆衫」求助。當演唱《女校男生》時，孖妹更趕不及換衫，一直只聽其聲，唱到半首歌才出台！除了蝦碌頻頻外，最抵死是阿Sa宣布Twins計劃明年推出國語碟，但阿嬌竟口不擇言說：「出到先算！」阿Sa即補鑊：「啋！一定出到！」笑爆全場！

阿嬌整晚「直腸直肚」，提到前緋聞男友方力申與鄧麗欣到馬爾代夫度假時，她衝口而出說：「我都想去！（同方力申？）唔係，我好早已經想去呢個地方！（佢繼當年同你去旅行，今次又穿煲？）哈哈！唔回應！我會祝福佢哋！」另外，問到阿Sa與前夫離婚進展，因近日終審法院就離婚夫婦財產訂下可平分身家，阿Sa說：「係咩？咁又唔使！」但阿嬌反為阿Sa緊張，連聲說：「咁你有So喎！」更講足兩次，令阿Sa大感尷尬，亦連說兩次：「我唔需要！（有機會分前夫一半唱片公司？）我唔想分我嗰啲喎！」

慶生辰感觸落淚

Twins更邀得關智斌及張致恒的「Boy'z」任特別嘉賓，阿嬌笑說：「乜唔係Sun Boy'z咩（指陳偉霆）？」阿Sa失笑說：「係Boy'z咋！」前晚正值阿Sa農曆生日，阿嬌除了推出生日蛋糕外，更重提因其中一年發生了事（床照事件）而未能跟她慶祝，說罷更感觸落淚，阿Sa即輕拍其肩膊安慰。