林峯忙甩轆冇膽溝女
林峯的《COME 2 ME林峯演唱會》的DVD及CD銷量達三白金，昨日舉行祝捷會，英皇高層吳雨及無綫高層樂易玲現身撐場。問到可有買禮物獎勵自己？林峯說：「冇時間買！（識個女仔當獎勵！）咁都得？識咗都冇時間陪。」他透露媽咪亦有催婚，建議為他物色女友：「阿媽叫我相睇，不過我唔敢去！緣分要靠自己！」工作密麻麻的他，原定前日由常平飛往北京拍攝電影《白蛇傳說》，但得悉銷量報捷即抽空回港慶祝：「我最想2月新年期間放假，返鄉下探嫲嫲。」
對於有傳古巨基為無綫唱劇集主題曲而攞硬「最受歡迎男歌星」，林峯笑言較有信心奪IFPI銷量獎，問到可有信心冧莊「亞太最受歡迎香港男歌星」？他自爆這個獎仍未放於家中的獎座堆內：「想再做好啲先！（滿意今年表現？）今年真真正正做到三線發展已經好滿足！（攞視帝？）真係冇諗過，我睇好歐陽震華！」
忙到甩轆的林峯，得悉奪三白金銷量後即返港舉行祝捷會。
林峯（右二）與吳雨及樂易玲（左）等高層飲香檳慶祝新碟銷量報捷。
吳雨（左）送上玩具四驅車，寓意林峯歌影視三線繼續衝。