「透視」片段曝光後，圈中女星人心惶惶，其中鍾舒漫促政府立例管制，而楊崢則希望將不法之徒繩之於法！
楊崢：「啲人好唔啱，佢哋係專業運動員，唔應該做呢啲嘢令佢哋分心，希望警方做啲嘢！以前都有聽過呢樣嘢，估唔到啲人搵呢啲嚟影，仲夠膽放上網，有關方面應該正視同嚴懲呢啲人，拉佢哋坐監！（有冇防備？）少啲去公眾場合！」
鍾舒漫：「好過分！科技愈來愈先進，竟然造就可惡分子，睇到呢啲新聞好唔開心，希望政府可以立例，令所有人有番啲保障，唔好有事發生先覺得好慘，之後就冇人處理！」
梁政珏：「好耐以前聽過有呢樣嘢，嗰個係咪真係郭晶晶？定係電腦效果？做藝人都驚唔嚟，如果有人有心做，點避都會影到。」
陳茵媺：「發生件咁嘅事，連普通市民都會覺得驚，咁做係侵犯私隱！（你因為怕被偷影，所以有料都收埋？）唔係嘅。」
龔嘉欣：「好得人驚！行騷做嘢冇得擔心，寄望保安嚴密啲，快啲有方法杜絕。（出街驚被偷拍？）唔會！呢啲係一少撮個別人士所為，或者行快啲、着厚衫可能避到。」
吳雨霏：「好離譜！係好嚴重嘅罪行，同性騷擾冇分別，啲人要有番啲道德！放上網同人分享更加唔啱，一係就私藏！（着啲靚啲嘅內衣？）唔會因為咁而唔着T-back！」
伍詠薇：「我諗緊係咪要着羽絨添！呢啲人一定要打擊，科技進步都唔可以濫用，唔可以容忍咁樣侵犯女性。」