劉嘉玲嫁入梁家兩年，為求生仔一直扭盡六壬，苦尋求子秘方。雖然嘉玲已年屆44歲，但她一直沒有放棄心願，可惜至今不但仍未見肚，婀娜蛇腰更勝從前！加上自被踢爆與內地富商交往後，嘉玲與偉仔聚少離多，造人革命被迫叫停，難怪她出席時裝騷時默認「停產」！

嘉玲（左起）與歌地亞雪花坐頭排睇騷，高層傍實。

美莎芭頓亦是時裝騷座上客之一。(Getty Images圖片)

嘉玲在意大利時間前日與荷里活女星美莎芭頓等出席《Salvatore Ferragamo 2010米蘭春夏女裝時裝騷》，雖然嘉玲姍姍來遲，但甫到場即獲品牌高層禮遇款待，又與國際名模歌地亞雪花合照。現場所見，穿上入膊長裙的嘉玲身材玲瓏浮凸，全程心情靚爆，有問必答。有記者笑她似足「空中飛人」，出席完威尼斯影展後轉往佛羅倫斯，現時又到米蘭，她笑說：「多咗好多嘢做，但真係好開心同Enjoy！」

留米蘭十日玩餐飽

問到工作如此忙碌，是否因而減少造人時間？嘉玲聽罷即哈哈笑說：「順其自然啦！」對於追仔追到氣咳的李嘉欣終於成功造人，問到兩年仍未有所出會否有壓力，嘉玲說：「唔係我人生目標！（效法溫碧霞領養？）都係嗰句，唔係我人生目標！」當再追問人生目標是甚麼時，她貫徹一向的生活態度，只拋下一句「Enjoy the life（享受生活）！」似乎想暗示繼續做一隻「冇腳雀仔」，多過做個湊仔婆！

問到近期是否少見偉仔？嘉玲只淡然地表示與以往差不多，對於老公忙於拍攝《一代宗師》，會否前往探班？她說：「我一向都好少探班，但佢喺開平拍戲咁近，所以今次就會探佢班。」她還透露今次米蘭之行將逗留十日玩餐飽。完騷後，嘉玲轉戰派對會場繼續狂歡！