樂壇天后容祖兒日前被林依麗指「歌星仔」，不宜評論菲律賓挾持人質事件。祖兒昨日在微博中留言：「不希望亦覺得無需要牽入沒必要的罵戰，說到底我們都是愛香港人，希望我們每個都會學慬（懂）包容，在此感激各方好友的支持，Warm爆左（咗）！有你們在，做死一世歌星仔都抵！」抱恙的她看醫生時嘟嘴影相來答謝好友。
何韻詩寸冇廉恥
祖兒抱「冇佢咁好氣」的態度，但好友仍在微博留言力撐，何韻詩寸爆林依麗說：「這些年來我學會體諒及包容，也明白其實不是每個人都有機會受過教育，我們懂得甚麼是禮義廉恥是我們的幸運，就為沒有學懂做人基本禮儀的林女士默哀吧。」蔡卓妍勁讚祖兒「可愛仔、爽直仔、樂觀仔、潮仔、義氣仔」作支持，鍾欣桐自言是「歌星仔仔」，而自稱「經理人仔」的Mani叫祖兒做「小BB仔」，馮德倫更爆粗狠批林依麗。
昨日本報致電林依麗，問到被群星狂插，她暗寸群星「唔出名」：「由佢哋回應，我連佢哋個名都唔知，唔識佢哋啲歌，唔好再畀佢哋出名喇！（點睇被改詞鬧爆？）多謝佢，當係啟發佢填詞。」隨後她上載短片，舉大字報激氣地向填詞人反擊：「佢哋博出位見報係職責所在，我唔使。」
昨晚祖兒與古巨基及一眾師弟妹擔任《英皇新秀歌唱大賽》嘉賓，壓軸出場的祖兒獲司儀杜汶澤力撐並非「歌星仔」，阿澤說：「祖兒係個好鍾意唱歌嘅女仔，佢冇放棄，一直堅持，依家已經係樂壇一姐，唔係歌星仔。」台下觀眾即拍掌支持；祖兒和基仔跟最後三強鬥唱，結果由譚永浩奪得「金咪大獎」，劉怡劼則獲「最佳才藝大獎」。
讚「稱號」夠Cute
祖兒完騷後接受訪問，對於被林依麗嘲諷為「歌星仔」，她說：「算啦！我唔回應，多謝各方好友愛護，唔想掀罵戰，我冇嬲，呢句幾Cute。（覺唔覺得佢抽水？）觀眾眼睛雪亮，佢揀咗我，要用包容面對。（馮德倫爆粗撐你？）冇特別留意，唔想炒大件事，每人有言論自由，馮仔有感而發，喺呢個世界上，自己係微塵，好平凡，冇乜特別，呢件事對我身心一啲都冇影響，作為公眾人物，喺咁混亂情況下要保持理智。」基仔亦力撐祖兒：「佢係『歌星女』，我先係『歌星仔』，性別要搞清楚，呢個稱呼好唔尊重，好遺憾。」