霍啟剛與跳水公主郭晶晶向來感情穩定，但昨日有指晶晶逼婚不遂以致情變，霍公子更(目及)中身材豐滿的台灣女主播趙彤，上周更被拍得一同出席富豪二代舉辦的《香港菁英會第三屆執委會就職典禮》。對於被指是負心漢，感情事一直低調的啟剛忍不住越洋澄清，他接受本報電話訪問時氣憤地說：「我係菁英會副主席，嗰日買咗張枱梗係叫朋友去，朋友再帶朋友嚟，咁就畀人寫我帶個女仔去Ball，覺得好愕然同好憤怒！啲相好明顯係合成，有啲三張合成一張。」

霍公子愈說愈激動，更喪插報道失實：「件事直情係虛構出嚟！我畀某傳媒喺呢啲報道上大做文章已經唔係第一次，做傳媒都要有專業操守，咁樣無中生有會誤導讀者！但我相信香港讀者係可以分辨是非。」他表示現時正忙於在南沙工作：「嚟緊又要去新加坡做嘢，唔想再為呢啲事動氣！」

趙彤熄電話失蹤

事件女主角趙彤的手機昨日一直關上，記者向其經理人求證是否與啟剛拍拖？其經理人說：「唔係！佢哋係朋友，大家一齊出嚟玩之嘛！趙彤都有睇報道，佢返咗內地做嘢，所以熄電話，但佢冇唔開心。（有冇發展機會？）唔會，係朋友。（傳霍啟剛陪佢開工？）梗係冇啦！每次我哋都有工作人員陪佢，都未見過霍啟剛。」無獨有偶，趙彤昨日於Facebook上留言指「小心枕邊人」，未知是否有弦外之音？至於菁英會成員之一的傅明憲亦力撐啟剛說：「冇可能！係咪誤會呀？趙彤同菁英會好多人好熟。（覺得佢份人點？）幾Nice、幾有禮貌同幾識Social。」