雖然昨日橫風橫雨，但仍吸引大批市民到書展，黃秋生亦不例外。他於下午五時低調入場，狂掃有關中國文化及投資等書籍，但唯獨不到o靚模的寫真攤位。問到會否去觀摩o靚模寫真？秋生說：「唔知喎！唔好搞到我喎！（知道『浸大E神』嚟咗？）過嚟睇醫生呀？」及後，問他可否用一句說話來形容o靚模，他引用剛在《廣州話俗語詞典》中看到的一句：「蜘蛛匿枱底，風雨一齊嚟。（係咪話啲o靚模係蜘蛛？）咁又唔好咁講。（Carol喺寫真中啜冰？）佢係符號學大師，成日做埋啲咁抽象嘅嘢！（買模寫真？）畀我都唔要，得物無所用，都係留番畀啲有心人。」據書中所解，「蜘蛛匿枱底，風雨一齊嚟」是指風雨前夕，蜘蛛也愛躲在桌子底等陰暗的地方。

穿上圍裙的楊梓瑤向買寫真集的粉絲送吻，大玩親民。

楊梓瑤勇闖書展宣傳新書，但未有幫粉絲簽名，相當守規矩。

至於Carol則於下午四時半左右現身書展，到其寫真攤位宣傳，與秋生無緣相見。穿上白色背心及熱褲的她，後來穿上圍裙扮員工，引來男女粉絲圍觀，期間更親吻女粉絲的面頰，Carol說：「希望寫真今日賣到五千本！（玩到咁激想打低周秀娜？）冇話要打低邊個，今次咁激都超過自己想像！如果見到佢都會送本寫真畀佢。」宣傳期間，她未有簽名，反而相約粉絲到樓下的Cafe再簽。

側田嘲豬扒好醜

除了秋生外，黃宗澤與側田昨日不約而同暗寸o靚模，黃宗澤自言對她們沒甚興趣：「我年紀大，同啲細路女有代溝，女朋友就一定唔畀佢着得咁性感！（買寫真？）冇幫襯呀！送嘅話都會睇吓嘅。」至於側田的言論就更激，直指部分o靚模是「豬扒」：「唔會買，都唔知點解有成幾百本，有啲仲係『豬扒』，都唔知點解出到寫真。（邊個？）總之好醜啦！」

黃宗澤與側田不屑睇o靚模寫真。

側田