黎明嫂樂基兒（Gaile）早前透露有意做媽咪，但黎明卻公開表示暫不想生。雖然有傳她瞞住老公停服避孕藥，並成功製造「小黎明」，但其實Gaile一直夫唱婦隨，據知目前仍未有餡。

「謠言止於智者」

Gaile與黎明結婚兩年多，雖然她曾透露造人大計，指距離做媽咪應該不會太久，但其後黎明在公開場合回應「冇造人」，直接否定有意做爹哋。幸好Gaile了解老公未有心理準備，故隨即改口風表示未有意生，並且透露工作大計，為黎明旗下藝人做形象顧問，實行湊藝人代替湊BB。Gaile一向順得老公，為免黎明自打嘴巴，故已採取避孕方法，嚴防突然有喜。不過，昨日竟傳出Gaile停藥，成功製造小黎明，還穿起鬆身裙及平底人字拖肚凸凸行街Shopping。記者就此事向其模特兒公司Calcarrie's Model查詢，公司發言人即代為澄清：「話Gaile大肚都唔係第一次，睇相都唔似大肚，係件衫鬆啫！佢早幾日先出席活動仲着貼身衫，總之謠言止於智者。」