本文重點
鬼妹仔湯盈盈日前身穿性感小背心獨自到中環行街，怎料沿途遭一名疑似「變態佬」跟蹤，嚇得她即匿入人群中躲避。數天後，她即刻收起性感外出晚膳，還找來猛男壯膽。
黑仔事件多籮籮的湯盈盈，早前拍外景時遭一名金毛男子當街掌摑，後來又因醉酒駕駛而惹上官非，最終被判160小時社會服務令、停牌12個月及罰款1,200元。她近日又有「新猷」，竟被陌生男子跟蹤！
急轉密實打扮
最近忙於拍攝新劇的盈盈，日前趁着不用開工獨自往中環行街。當日下午五時許，戴黑超、穿性感背心及牛仔褲的她現身皇后大道中，期間見她行色匆匆走入附近一間時裝店。不過，她沒有專心睇衫，反而偷偷望出店外，逗留數分鐘後急急腳前往士丹利街一幢大廈，搭升降機上樓及放低手上雨傘後便離開。當記者上前跟她打招呼時，盈盈一臉驚慌，並猶有餘悸說：「嘩！嚇死我呀！頭先有個變態佬一直跟住我，我好驚呀！所以入咗間舖頭裏面避一避。（去邊呀？）冇咩特別，我去買啲嘢食，之後去做Facial囉！」
相隔數天後，盈盈避免再被人跟蹤，就算在炎熱天氣下亦收起性感，由小背心改穿長袖外套，與好友周家蔚到尖沙咀打邊爐晚膳，同行還有猛男相伴。滾到凌晨12時，戴帽包到冚的盈盈在兩名好友陪同下步出火鍋店，並齊齊登上她的座駕，然後由盈盈充當「柴可夫」接載他們離開。
