時光飛逝，回想起戴后冠至今的日子，Sandy自覺過了相當充實的一年，認為參選港姐是她最無悔的事情：「諗番都唔明白點解嗰時可以咁堅強，仲記得有次面試見到李嘉欣同任達華好興奮，面試時佢哋仲同我傾咗好耐。」對於卸任在即，她卻依依不捨，勉勵候選港姐不用太計較賽前是非，因為「真金不怕洪爐火」，反而應盡量享受比賽過程：「個個人都話我上次得獎加冕繞場一周嘅時候行得太快，今次我頒獎前行樓梯嘅時候一定會行番慢啲，好好享受番呢個歷史性嘅一刻！」
在這得獎後的一年裏，Sandy做了不少慈善工作，但令她最印象深刻的還是參加世界小姐。除了認識來自各地的佳麗外，她還明白到有些人對「美」的堅持與尊重：「佢哋有啲精神真係好需要我學習，例如就算淨係喺酒店食早餐，佢哋都着好隆重嘅Cocktail Dress，絕對唔會馬虎！」
剛入行難適應
她亦有感時代有別，現在的選美跟以往相差甚遠，參賽者需要面對的壓力亦較大，她自爆參選時曾試過同時被七、八個記者追蹤：「我好記得有一次落大雨，又有黑色雷暴，我見到啲記者跟住我，都覺得佢哋好可憐！最後我畀佢哋跟到返舖頭。」初時看到自己的負面報道，她亦會很生氣：「開頭激動起上嚟真係想揸爛份報紙！不過，有新聞係一件好事，最緊要唔好睇得太重，後來都冇特登去睇。」
家中開茶餐廳的Sandy表示，當初返港除參選外，另一目的就是幫母親打理生意。剛開始時，她經常親自到茶餐廳幫手，但當選後就比較少返舖頭幫忙。當時她毅然參選港姐，除了獲得母親跟弟弟支持，她的表姐、同是港姐冠軍的林敏俐當得知她入選時，亦致電教授「致勝秘笈」，她說：「佢依家喺美國做緊生意，佢好堅強，喺佢身上學到好多嘢。參選時佢建議我唔好諗住要贏，要以預咗輸嘅心態去玩。」得獎後，Sandy不敢鬆懈，現正尋找合適的老師教演技，閒時亦會練舞，希望裝備自己接受未來挑戰。
近年的港姐選戰中均愛找參賽者的親人上台講感受，Sandy那一年最令人難忘的，相信是她那位只有十歲的弟弟所說的一席話：「佢話『無論你攞唔攞到獎都好，你都係我心目中最靚嘅！』我聽完之後真係好感動，不停叫自己唔好喊！」弟弟雖然年紀小，但心智卻很成熟，兩人似朋友多過似姊弟，但原來他們是近這一、兩年才開始混熟。
參選時緋聞多多的Sandy，最激烈一宗就是「斷背疑雲」，不過她在訪問中首次承認蜜運中，對象是紳士風度十足的英國男士，笑言可將一切不實傳言一掃而空：「其實我喺英國做嘢嘅時候識佢，識咗佢都四年。幾個月前我去英國探朋友，再見到佢嘅時候感覺到大家都仲係鍾意對方。」她的男友現時正積極申請到香港工作，若成事的話兩口子便可朝夕相對！問到男友的優點時，她即時露出小鳥依人模樣：「佢好甜蜜、忠實，同佢一齊好安全，佢真係有好多優點講唔晒！」
難忘弟弟支持
對於多位歷屆港姐被包養的傳聞，Sandy認為要考慮到現實層面：「講真錢唔會解決到所有問題，係咪真係為咗錢呢樣嘢而奉獻咗一生？」提到現任男友，她還透露已帶他見家長：「好嘅男人真係好難搵，最緊要係錫我同埋我屋企人，佢定時定候喺我嗎咪生日嗰陣都會買花畀佢。」想不到外國人亦懂得行「外母政策」，幸好母親對他亦十分滿意：「我記得去英國之前，阿媽特別吩咐我唔好搵個鬼仔返嚟，但佢依家見過都讚好，感覺到佢係一個好男人！」
後記：「瘦」外慧中
「真人比上鏡瘦」此話絕對正確，在電視上看到Sandy身形勻稱，怎料一見真人，只能驚嘆出一個字－瘦！幸好替她借的全是零號的服飾！不過，原來當年剛抵英國的她亦如其他ABC一樣，難抵炸魚薯條誘惑，高峰時體重更直逼120磅！後來自動自覺減肥才回復索爆身材，所以話「呢個世界冇醜嘅女人，只有懶嘅女人」！