本文重點
世界盃開幕戰，南非對墨西哥吸引不少娛圈中人關注，不論男女更邊睇邊在微博留言，如李克勤、鄧麗欣、蔡少芬、謝雪心、傅明憲和孟瑤等。當中最意想不到是本身已屬好波之人的孟瑤，講起世界盃球賽很肉緊。孟瑤在微博上表示由一開波已興奮莫名，直到入第一球，她說：「我激動得起了一身雞皮疙瘩！」接着又評論：「感覺南非要輸，我這麼看不懂足球的人都覺他們踢的沒章法沒計謀……」到球賽打和完場，她更覺意猶未盡。還有蔡少芬在睇波不忘在微博寫上鍾意睇靚仔，她留言：「我是說卡卡好靚仔，呵呵呵！」
克勤估到打和
至於圈中有不少專業「波評人」於賽後有Say，大講獨到波經。
李克勤說：「尋日都估到會打和，只係估唔到係1比1，今場波水平好低，係近呢幾年世界盃揭幕戰最唔精彩嘅一場，好似平時睇英超中下球隊咁，少少意料到，始終兩隊唔係A級球隊，同埋發揮得唔好，唔知係咪踢嘅地方喺高原有關，見墨西哥球員踢得好辛苦。（有邊個球員踢得好？）冇，踢得差就有好多。如果用海軍鬥水兵就難聽咗啲，不過唔緊要，感受吓氣氛，相信英格蘭對美國場波會更精彩。」
至於昨日出席商場活動的馬國明，昨晚觀賞揭幕戰後說：「對球賽都算滿意，兩隊都有入球，希望南非做主辦國可以進身十六強，因為過往未試過有主辦國出唔到線，睇咗第一場波之後，覺得今年非洲球隊比較有着數，可能天氣問題，北歐球隊會唔係好慣，今日睇南非水準踢高咗一線波。」