近來娛樂圈出現一批標榜性感的模，經常露肉博上位，不過無綫小花姚子羚及龔嘉欣卻拒絕倣效！兩人最近首次合作拍攝無綫新劇《蒲松齡》，即變得老友鬼鬼，她們異口同聲表示希望以實力突圍取勝。

姚子羚（左）和龔嘉欣最近因拍戲成為老友，不時雞啄唔斷。

姚子羚希望演技昇華，故最近拜廖啟智為師。

着泳衣唔自然

姚子羚認同走性感路線較易成名，但絕非長遠之計，她說：「性感係容易令人留意，但如果每次都性感就冇新鮮感，最重要都係實力，最近我搵咗智叔（廖啟智）做老師跟佢學戲，佢唔單止好戲，仲好容易相處人，係個好好嘅老師！」至於龔嘉欣雖然曾以泳裝示人，但她自言十分怕醜，露肉時會大感尷尬：「我本身好傳統，着泳衣喺人面前，感覺好唔自然，我嘅底線只係露腳，不過平時都好少着裙。（性感係成名捷徑？）我個人比較踏實，所以想以實力演技成名，不過每個人都會有自己嘅路。」另外，龔嘉欣透露想轉型做打女，飾演型格女警角色，由於她有跳舞底子，目標是做到惠英紅般演得兼打得。