獲網站選為「最愛美容品牌代言人」的Joey，昨日以黑色Gucci中性套裝現身，腰間、大腿及背脊均「穿窿」，白滑肌膚若隱若現，相當性感！連日飽受肚屙折磨的她表示，身體已逐漸康復，但清減不少，她笑言病痛纏身與犯太歲有關：「今年失聲、感冒到依家肚屙，半年內病足四個月，你都咪話唔信邪！咁大個女都未試過病得咁痛苦，搞到我前幾日去菲律賓拍戲，都要隨身準備幾個膠袋戒備！」本月16日踏入「女人30」的她透露，獲公司「特赦」，放假幾天休息，惟因擔心舉行派對飲酒傷腸胃，唱卡拉OK又怕失聲，故Joey選擇低調度過牛一，攤抖當叉電。

Evelyn舊相唔見得人

另外，同場的模Evelyn、Anjaylia及Leanne Ho獲邀上台分享扮靚心得，她們坦言入行前對扮靚一無所知，Anjaylia更只懂以清水洗面，Evelyn說：「中學時代真係唔識打扮，希望大家唔好搵到舊相！（怕畀人話整容？）如果有人話我整過都幾好，證明我靚咗囉！不過我個樣真係差別唔大，對眼依然咁細！」