江若琳與陳鍵鋒拍攝劇集《洪武三十二》，屢被讀者爆料指拍拖，日前再有讀者爆料指兩人在微博傳情，除以「緋聞男女」自居外，又指他們拍劇時一款衫兩份着，江若琳穿了男裝Size恤衫。該讀者發放二人在微博的照片，證明兩人確實穿過差不多顏色的恤衫，只是花紋有點不同。記者致電江若琳，她說：「好無聊！冇可能一件衫兩份着，近期確實會着一啲鬆身衫方便排舞，呢個讀者作到啲咁得意嘅古仔，好有幻想力，下次可能會話我同佢一條褲兩份着，呢啲傳聞真係得啖笑！」而陳鍵鋒亦覺得離奇：「我都唔多着恤衫，但江若琳確實經常着大Size嘅衫。（點形容你哋嘅關係？）同事！（發展？）所有人未結婚嘅都有可能，江若琳性格開心易相處。」對於被讀者爆料指互傳肉麻短訊，他覺得冇必要因此而跟江若琳斷絕短訊來往。