前亞視藝員譚筠怡早排做咗禁毒活動嘅司儀，雖然佢已經30幾歲，難得仲保養得好好，小小So見譚筠怡仲咁索，忍唔住問佢會唔會重投娛樂圈？譚筠怡話有諗過，不過又自覺已經係中女，所以疊埋心水搞生意好過！
譚筠怡：我中環嗰間珠寶店開咗半年，生意都幾好，好多人都鍾意我嘅設計，好有滿足感！
小小So：最近有乜力作？
譚筠怡：好似我手上嘅紫晶戒指，碎鑽戒指同耳環都係我嘅最新作品！我仲參加過好多國際性嘅珠寶設計比賽，得過總冠軍同亞軍，證明我嘅設計得到認同，令我更加有信心繼續做設計師！
小小So：咁你賣啲珠寶貴唔貴？
譚筠怡：有平有貴！好似我呢枚紫晶戒指賣4萬幾，都唔算貴，因為粒石有成粒眼核咁大！不過我都有賣幾千蚊嘅首飾，相反幾十萬都有！
小小So：係咪只做闊太生意？
譚筠怡：暫時都係做熟客，不過我都諗住發大嚟做，考慮做埋街客，吸納更多客路！
譚筠怡近年搞生意搞得有聲有色，又賺到大錢，唔怪得佢唔眷戀捱更抵夜嘅娛樂圈工作啦！