最近楊千嬅死撐回收嘅派台歌冇走音；而唐貝詩因「盆景貓事件」被圍插，雖然媽咪寇鴻萍不停解畫，可惜愈講愈衰，今期金句都是死雞撐飯蓋！
楊千嬅
早前楊千嬅回收疑似走音派台新歌《飲酒思源》，但強調冇可能走音：「唔通公司二十幾人聽障？」
解讀：佢唱到咁高音，可能連聽障都聽得好清楚！
傅穎睇三級片
清純玉女傅穎要轉形象學跳性感熱舞，為令眼神更撩人，她竟說：「我會睇三級片學吓！」
解讀：可能三級片未必可以幫到你，但參考賈曉晨玩獎門人時吸乒乓波個樣，實有得着！
寇鴻萍愈幫愈忙
寇鴻萍愛女唐貝詩因「盆景貓事件」被全城圍插，身為媽咪當然要力撐愛女，但她竟說：「我又唔覺得咁大件事。」
解讀：其實連續上咗幾日娛樂頭版都唔係好大件事啫！又唔係上咗幾日新聞頭版，黑色幽默嘛！
諸葛梓岐認低能
諸葛在微博上載電影《猛鬼街》銀幕照，即知衰認錯：「下次唔會做啲咁低能嘅嘢。」
解讀：既然諸葛公主都肯知錯認低能，難怪大家會即時原諒佢！
周秀娜認錯老公
「寫真女王」周秀娜遠赴歐洲影新一輯噴血寫真，以「3D洞房」做賣點，更表示要清場拍攝：「差啲當咗攝影師係老公。」
解讀：咁周秀娜出道以嚟，應該儲埋唔少老公！
汪明荃扯火倒米
近日汪明荃在《荃加福祿壽》中開金口，被網友批難聽又走音，阿姐即扯火說：「轉睇第二個囉！」
解讀：身經百戰嘅阿姐依然咁好中氣鬧人，真係唔相信佢會走音！