過盡千帆，畢竟人已走到「三張」，葉璇新聞的價值不可用是非緋聞焙出，她知道要繼續撈下去就是要靠實力。蟄伏於影圈打滾再打拚，她終憑《意外》意外地奪得香港電影金像獎「最佳女配角」，台上領獎時淚盈於睫的一刻，葉璇有感而發地說：「曾經有導演同我講，話冇人會搵我做女主角！」
下一站......影后
刻下有個「小金人」獎座，葉璇聳聳肩說：「其實我同嗰個導演好熟，係邊個我就唔講喇！不過佢自打嘴巴囉！舊年佢講完呢番說話，第二日就搵我做女主角，佢話講嗰時好認真覺得冇人搵我做女主角，但第二日就搵番我，其實我哋合作過好多次，唔會嬲！」
這一句對消極的人來說，無疑是一沉百踩，但對硬頸的葉璇來講，只是鞭策！她說：「其實導演呢番話唔會動搖到我嘅信念，一般人可能會覺得好沮喪，但我覺得反而係一種激勵！我唔介意做配角，無論係主角、配角我都會用心去演，因為我鍾意演戲，係一種喜悅！」
人的欲念是無止境的，何況葉璇是一個Aggressive（有野心）的人，她豈能甘於只做一個最佳女配角，下個目標定必是影后：「我唔知呀！順其自然啦！攞當然想攞！但一定要循序漸進，好似《意外》攞女配角，其實係一個意外驚喜，好彩套戲係冇劇本，係因應我嘅性格去做，做番自己，可能因為咁有得加分！其實我覺得攞呢個獎都唔算遲，有啲演員做咗幾十年都冇獎，咁係唔係代表佢哋演得唔好？獎都唔係咁有標誌性，最緊要係有口碑。」
無綫亞視如恩人
葉璇從來就是這樣自信，她知道自己的天分去到哪裏，所得的就去到哪裏：「我認為天分同努力各佔40%，缺一不可，仲有10%就係運氣，運氣即係人和！好好彩，我一直都唔會缺少人和，好平穩咁做到自己想做嘅嘢，所以我要多謝潘嘉德（無綫監製）、杜Sir（杜琪峯）等伯樂！」
華姐出身的葉璇是100%無綫（TVB）製造，經歷過亞視（ATV）、影圈多年打滾，她可有感到鳥倦知還？葉璇答得堂皇，但明顯不願得失任何一方，果真是世界女：「總之我會以劇本行先，唔會在乎邊一間機構出品，我都想再拍香港電視劇，但要睇機緣。當然我同無綫感情最深，我嘅根基都喺呢度打穩，出面嘅導演都話TVB嘅演員最慳菲林，真係引以為榮！但ATV都好好，《情陷夜中環》可以話係我代表作。總之冇話一個人喺一間機構呆足一世！」
耕好自己塊田
當年的「新聞女王」，如今要轉型做影后，同樣都是Queen，但行的方法不同，葉璇強調自己丁點冇變，的確她沒有變，因為她只以自己的想法行事：「人哋點睇我從來唔會理，因為我一啲都冇變過，之前同小學同學食飯，佢哋都話我一啲都冇變。我只在乎家人同朋友點睇我，外人嘅說話從來都唔會去理，所以我從來都唔會去睇娛樂新聞，啲不實嘅傳言我唔可以控制，你就算話我以前見報率有幾高，呢啲只係宣傳，睇公司嘅宣傳安排。」她續說：「總之我有我喺呢行嘅生存方法，只要做好我嘅表演工作就得，我冇掩耳又何來盜鈴呢！葉璇係一個只會耕好自己塊田嘅人！」
憧憬結婚生仔
鄭裕彤、熊倪、田亮及陳浩民……這長長緋聞表內的名字，在葉璇的生命中大可作古，人是要向前望的，她說：「我覺得工作、友情、親情同愛情喺我嘅生命係缺一不可，我一定會結婚生小朋友，我要樣樣都有先叫做完美，先可以做到一個完整嘅女人！我成日會幻想喺最正確嘅時候，遇到最正確嘅人，我可能已經遇到又可能未遇到佢，唔知呢，諗起都浪漫！」
後記：執着的為食貓
都說葉璇是一個執着和有己見的人，包括食！訪問當日正值午飯時間，葉璇的五臟廟噹噹作響，但女人總愛美，很多女星總會待拍攝完畢才吃東西，但她無懼肚皮脹起，仍要嘗個飽飽的午膳方肯拍照，說做就去做，果然是講得出做得到！猶幸她對小記亦照顧有加，簡單一句：「食唔食呀！」冧爆！難怪她有那麼多緋聞男友！