鄭伊健在娛樂圈打滾23年，嘗盡人情冷暖，雖然參加新秀入行，又讀過藝員訓練班，但他並沒有得到很大的認同，多年來冷嘲熱諷如家常便飯，可幸伊健好勝心強，這些說話只會變成激將法，刺激他發憤圖強。
好硬頸唔激得
「曾經有人對我講：『你做戲唔掂，唱歌又唔得，仲賴死做乜？咪喺呢行阻住晒！』呢啲說話並唔係我最霉嘅時候聽到，而係90年代，我唱片賣得最好，拍戲票房最勁嘅時候，風光時都有人咁樣對我講，可想而知當我冇乜嘢撈嘅時候，啲人嘅說話有幾咁難聽！」跟伊健合作過的人都知道，他是一個健談，但不談是非的人，亦不喜歡將感情事掛嘴邊，在他口中最常提起就是好朋友陳小春和經理人林珊珊：「我視珊珊為家人，佢嘅家人亦都係我好朋友和家人，我嘅生活好大部分都同佢有密切關係。至於小春，君子之交淡如水，我哋一年聯絡兩三次，但可能識於微時，一齊奮鬥，感覺好兄弟，好有信心我有事佢一定會撐我，我好珍惜呢份信任！」
「其實早在訓練班年代已經有呢啲人『出口術』，當年有個同學已經簽咗約，但我冇，一定要靠考試入TVB。當時我呢位同學對我講：『你死咗條心，你做唔到明星o架啦！』佢想打擊我，不過因為佢呢句說話，我決定要靠自己畢業，所以我要更努力。」87年，伊健憑一個檸檬茶廣告令人認識，走紅後他聽到更多冷言冷語，但他依然笑看風雲：「我夠樂觀，點會就咁被擊倒？不過有時一個人嘅力量有限，身邊有朋友打打氣，心灰一陣又冇事。」伊健笑言有時他會充當輔導員安慰經理人林珊珊：「我哋兩個好得意，互相都有火滾嘅時候，但一定唔會兩個一齊嬲，總有一個會冷靜啲去平息怒火。」
反應慢半拍
前輩名言「少說話，多做事」，但伊健其實很想出言反擊，奈何他甚少開口反擊，是他軟弱嗎？伊健偷笑，然後坦白自爆：「我份人反應慢，要做足準備工夫，所以我唔可以玩遊戲節目，因為即時反應慢。其實我成日匿喺屋企，自己練習和綵排。（電視台經常飛紙仔，咁你點算？）咁我就一早喺屋企做定功課，雖然冇對白，但有故事大綱，心裏預先構思對白和準備幾款表情和反應，當然經常估計錯誤，始終我唔係編劇嘛！」伊健哈哈大笑幾聲，再悄悄地自言自語：「所以我拍劇渣過拍電影，哈哈！」
拍拖全程投入
「冇所謂」是伊健的口頭禪，其實他不是冇所謂，只是他的底線經常放得比別人低，死穴，還是有的：「家人，說我甚麼都可以，但不可以踩我家人頭上。」疼錫父母和妹妹的伊健，入行以來都努力保護着家人，包括女朋友：「朋友話因為我係天秤座，有時候會好沉迷，有時會好理性。所以每次拍拖，我會投入初初拍拖嘅蜜月期，唔畀自己太理智，亦希望唔好被外界影響，刻意唔理會其他人意見，戀愛唔可以理智。」然而蜜月期過後，伊健亦會返回現實世界：「每個人嘅蜜月期唔同，亦會因應對手而不同。（蒙嘉慧YoYo呢？）佢呀……都算長，或者因為大家都忙工作，唔可以成日見啩！」
會結婚唔生仔
過往提起「女朋友」三個字，伊健總是迴避，談情說愛始終不是他的專長，與YoYo拍拖四年，最近提起女友，伊健變得大方：「可能係Timing問題，我成長咗、經歷唔同咗，個世界……應該係話個娛樂圈遊戲方式唔同咗，公司又唔同咗，最重要係我喺呢個圈個位置已經改變，種種原因加埋。」原來是Timing問題，YoYo爽朗和倔強性格，令伊健又愛又擔心，他說：「佢好鍾意工作，而且好投入同堅持，其實佢份人好簡單，但呢個圈咁複雜，佢好輸蝕。」身邊好朋友陸續成家立室，伊健承認亦有考慮婚期，但強調不是受好朋友結婚影響：「其實近年真心有諗過（結婚），但亦都係Timing嘅問題，仲要諗多一陣，畀啲時間我啦！」至於傳宗接代的問題，他肯定地說：「唔考慮，呢個社會和環境，連我都透不過氣。（YoYo呢？）我哋有默契，多謝關心！」
後記:三年後的覺悟
人成長了，經歷改變對同一件事的看法。三年前，伊健仍然為十幾年前被批評「冇實力，一世好運」而耿耿於懷，今日同樣一句說話不會再觸動他的神經：「呢幾年世界各地發生好多天災人禍，生命無常，幸福唔係必然，我能夠擁有家人、朋友、健康同鍾意嘅生活，應該感恩，畀人哋話吓『好運』又有乜所謂！」