吳彥祖（Daniel）與Lisa S.相戀8年，終於上月在南非秘婚，但Daniel被指與「吳太」Lisa講心唔講金，他名下位於西貢的四千萬豪宅別墅及近百萬元的新款名車，統統沒有老婆份，難怪冇車冇樓揸手的Lisa S.亦出到口，呻老公除了求婚戒指外，從沒有送過鑽戒給他，二人亦沒有聯名戶口。

吳彥祖為Lisa開車門，認真細心。

Lisa昨日出席活動，提起前一晚的燭光晚餐仍甜在心頭。

適逢Lisa前日33歲生日，Daniel即出冧招補鑊，與老婆共度婚後首個生日。前晚約七時許，兩人雙雙離開西貢寓所，並在司機接載下，乘坐Daniel早前花費約百萬元購下的新款AUDI的Q7啡色座駕，直往中環歷山大廈。抵埗後，作斯文打扮的Daniel先行下車，有風度地為老婆開定車門，二人十指緊扣行了幾步後，Daniel突然一個箭步折返座駕，拿出一盒小型禮物，並放在西裝袋中，才與老婆步往大廈二樓的意大利餐廳。記者上前問Daniel，會否趁Lisa生日送厚禮作補償？他即說：「梗有啦！不過唔講得住，一陣佢就知。」

吳彥祖折返座駕攞禮物，準備給Lisa驚喜。

吳彥祖與Lisa笑容滿面返家度春宵。

日日努力造人

兩人在餐廳逗留約兩小時才手拖手步出，再被追問送了甚麼給老婆時，Daniel只笑笑口說：「真係秘密，唔講得。」問到Lisa收到老公的厚禮時是否很開心？Daniel即搶答：「佢梗係開心啦，我同佢結咗婚，我已經就係最好嘅禮物啦！」氹得在旁的Lisa不停冧笑，二人隨後乘車返歸，繼續溫馨。

此外，Lisa S.昨日出席活動，被問到怎樣慶祝生日？她說：「夜晚同Daniel一齊食晚飯。（浪漫？）非常浪漫，係燭光晚餐，我哋食咗好美味嘅意大利菜！佢送咗份禮物畀我，係隻好巨型嘅足金戒指，其實佢幾日前問過我想要咩，我話『你時刻都可以送珠寶畀我』，當我收到隻足金戒指嗰刻好驚喜，好開心！（第一次以吳太身份過生日感覺點？）好特別，正常我每年過生日都會唔開心，因為又大一年，但今年係第一次冇呢種感覺，仲覺得好開心，可能係我已經成為咗Daniel嘅太太，唔使再諗幾時嫁人，踏入人生另一個階段。（出年生日有BB一齊過？）希望啦！我哋每晚都好努力同好唔安全咁造人o架！」