混血名模Danielle Graham舊年嫁人同生咗個可愛BB仔後，一直留喺馬來西亞相夫教子做幸福少奶奶，Danielle同小小So講，依家一日廿四小時都唔夠用，每日六、七點就起身，到夜晚十點就瞓，因為全日都要照顧BB，就算有工人都唔放心，情願自己睇到實。
唔好以為Danielle以前愛玩愛蒲，佢話其實一向都係鍾意喺屋企活動嘅人，只係以前有時出去玩畀人影到就寫到好大件事！佢仲話佢一向好鍾意研究食譜，就算結咗婚有工人，都唔會全部由工人搞掂三餐，自己都會落手落腳煮嘢食，小小So同佢都覺得咁樣先至有生活情趣！