Q：鍾意畀人追定主動出擊？

A：鍾意畀人追！我從來冇試過追人，因為冇咁嘅膽識，而且畀人追嘅感覺好開心，呢段時間通常係最美好嘅時刻，互相摸索對方，男仔對女仔特別細心，大家只會留最好一面畀對方。

Q：幾歲開始拍拖？初戀嘅感覺係點？

A：十五歲第一次拍拖，我嘅初戀感覺係好好笑，因為拍拖嗰陣未拖過手！我係一個好被動同怕醜嘅人，點知對方仲怕醜。其實我嗰陣好想佢拖我，畀晒機會佢都冇拖，所以有啲嬲但又唔敢講，最終忍唔住分手！不過諗番都仲好開心，係一段好純真嘅戀情。

Q：要同好醜樣嘅對手演感情戲，你會點樣培養情緒？

A：事前會相處多啲先，雖然外表好重要，但內在美亦唔可以缺少，事前相處可以發掘對方嘅內在美，我唔覺得醜樣就要受到隔離。

Q：覺得邊個男星最適合做老公？

A：劉青雲、郭晉安！佢哋係啲冇緋聞嘅藝人，對老婆好專一，畀人一個好先生、好爸爸印象之餘，仲畀人感覺到一份安全感。佢哋可以照顧自己，又可以照顧身邊人，咁樣做每個決定都會好安心。

Q：鍾意自拍定鍾意搵人影靚相？

A：鍾意搵人影靚相！因為自拍嘅範圍好細，淨係影得個頭，最多都只係影到三個人。搵人影就可以影晒成個景，又可以拍唔同角度。我鍾意影相流露真表情，自己揸機嘅話好難一邊影，一邊流露真表情。