昨日Angelababy出席adidas世界盃活動，穿上大會特別設計的球衣連身裙，被指谷胸冧黃曉明的她，身材更見玲瓏浮凸。對於被拍得在北京夜會黃曉明？Baby有備而來：「睇戲好普通，冇乜大不了。（你上去佢屋企？）嗰度唔係屋企，好多工作人員都住嗰度。（谷胸約會？）誤會囉！我唔小心拉低咗件衫！」她表示從未與黃曉明單獨約會，強調為對方拍MV才混熟。記者笑問可會像郭富城與熊黛林般拍MV撻着？她即說：「佢哋有撻着咩？多個朋友啫！係佢（黃曉明）公司搵我公司，有時間咪拍囉！」

問到如何形容二人關係？Baby突然變臉，害羞口窒窒說：「幾Friend囉！（有冇發展可能？）唔知點答。（你哋兩個都單身？）都係，但將來嘅嘢冇人知。」問到黃曉明是否她喜歡的類型？她說：「我鍾意爹哋嘅類型，因為佢有時間陪我睇世界盃。（曉明都可以？）佢太忙。（因為佢冇時間阻礙發展？）如果真係拍拖，有冇時間係唔關事。」

嘆被追訪似坐監

Baby表示不怕輿論壓力，講到明有心理準備因緋聞被追訪，但人前人後講「被追訪」的感受卻截然不同，同日她在微博留言，直指很多傳媒追訪，令她不再有私人生活，慨嘆生活像坐牢一樣。

現場所見，Baby戴着一枚心形戒指，她即此地無銀地說：「自己買o架！」而其經理人Kim認為看戲只屬普通事。黃曉明的經理人則說：「當時自己不在場，不能代曉明回應，但過幾天他會去香港，讓他自己回應！」