寇鴻萍大女唐貝詩（Lydia）前日在微博上載一張「盆景貓」照並大讚可愛，更聲稱已訂購一隻，震驚娛樂圈！不少藝人如周柏豪、梁詠琪、何韻詩，甚至其契媽鄭裕玲（DoDo）等，都對她口誅筆伐，可惜她似乎沒有痛定思痛，昨晨再於微博用英語留言，反咬眾星沒有查明真相便公開對她亂發炮，又在周柏豪的微博留言死撐，令事情愈鬧愈大！
價值觀有問題
雖然寇鴻萍事後立即代愛女向周柏豪賠不是，並感激他代為教女，但未能平息其怒火，昨日他在微博質疑Lydia用生命開玩笑，價值觀有問題，又上載一張貓看盆景的照片，並以「世界多美好」為題寫道：「不要試圖再次拾起對方的空彈殼去投擲對方，這是不智的，子彈已經在你的身體裏……你愈多在我這裏留言，你流的血只會愈來愈多！」昨日周柏豪接受本報電話訪問時，繼續對Lydia連珠發炮：「我覺得佢心有不甘，我已經教佢愛貓嘅方法，但佢好似唔明。雖然佢只得23歲，但好多23歲嘅人都做好多有意義嘅事！」他直言覺得Lydia不負責任：「之前只係覺得佢唔識嘢，依家佢咁講真係好討厭，真係對佢有少少失望，想佢好先會留言，依家好似浪費咗！」
至於張智霖得悉Lydia叫眾星查明真相才開火，立即嬲上加嬲，留言表示對這種人「不聞不問」，事後接受電話訪問時更說：「呢啲人對我嚟講不癢不痛，但我深信人之初性本善，你唔係話畀我聽你係『大話精』呀？冇人Suppose會留謊言，你不如話有恐怖突擊，睇吓國家點對你！仲留啲咁嘅評論，好人有限啦！It doesn't make sense！呢啲一啲都唔好笑。」
母親代為受靶
面對群星圍剿，身為媽咪的寇鴻萍只好代女受靶，昨日她出席活動時遲到一小時，明顯有備而來！她表示Lydia正在英國考試，待心情平復才返港：「我睇見佢個微博，覺得好恐怖同惡心，佢解釋之後，我不為意就瞓咗，今朝睇番先知咁大件事，我已經鬧咗佢，DoDo都鬧咗！作為公眾人物，應該更珍惜生命！」對於Lydia的反擊，她說：「佢已經Say Sorry，佢知錯喇！就當上人生寶貴一課，困難又好，挫折又好，等佢學吓！」她還自認教女無方：「如果我即時制止，就唔會咁大件事，係我一時疏忽，要負少少責任，如果有人話我係唔會介意，咁仲好，有咁多人幫我教女！」事後她在微博表示，深深體會「養兒一百、長憂九十九」的道理，而DoDo則留言祝願Lydia上了寶貴一課。至於Lydia昨午亦再度留言道歉，並強調自己沒有虐待小動物，希望大家諒解。