呢期好多明星都玩「微博」，好似中晒毒咁，無論搭緊車、化緊妝、休息緊，甚至連活動緊都照玩，小小So見親啲明星，個個都叫我關注佢，唉……真係瘋狂！不過小小So都明嘅，內地有十幾億人，呢種宣傳方法真係好有用，無論係電影、演唱會定電視劇，只要明星落力少少去Post，大家就會「關注」多啲，不過事關微博好坦蕩蕩，咩人都睇到，小小So認為講說話點都係小心啲好！
好似陳曉東咁，近幾年都主力喺內地拍劇賺人仔，佢都成日上微博放啲劇照同歌迷分享，好似內地已經成為佢第二個屋企，理論上應該好愛祖國先係吖。不過小小So覺得好奇怪，東東喺微博都幾敢言，好似前排上海世博會隆重開幕，佢喺微博度留言，狂踩個開幕式好老土，嘩！咁主觀嘅言論，唔單止冇乜歌迷鬧爆佢，仲有其他人回應話同意添，認真搞笑！