港姐陳倩揚已經卸任咗一段時間，佢最近做節目主持之餘，仲開始拍劇，但倩揚似乎走唔甩港姐框框。小小So早前同一位龍友吹開水，龍友哥哥話原來倩揚影相擺啲甫士好生硬，仲好似選港姐咁，成日叉腰同「丁字腳」，小小So即時打畀倩揚八吓究竟乜事！
小小So：啲龍友話你影相甫士生硬？
倩 揚：可能慣咗手勢，仲未走出港姐框框，嗰時教叉腰同丁字腳，要我哋擺甫士斯文啲，唔好擘腳同烏身。
小小So：點樣擺甫士自然啲？
倩 揚：其實我可以活潑啲同調皮啲，所以呢排睇緊有關挑選模特兒嘅節目，學佢哋擺甫士，依家少咗叉腰，隻手盡量自然啲。
小小So：屋企練甫士？
倩 揚：梗係有啦！我屋企有塊全身鏡，每次出席活動之前，臨出門口都會喺塊鏡前試吓擺甫士，練耐咗又確係有進步，依家自信心強好多。
小小So：最欣賞邊個Model？
倩 揚：Angelababy同樂基兒好好，Baby變化多端，樂基兒就畀人舒服同自然開心嘅感覺。