家強昨日到新城宣傳下月與張學友、關淑怡舉行的《他來自非洲慈善演唱會》，提到林楚麒最近宣布復出樂壇，還自稱為家駒梳起唔嫁，成功贏得見報率，他即勞氣地說：「叫佢唔好亂講嘢，叫佢小心啲！（你會採取行動？）我都講嘢佢就死！（你哋冇偈傾？）叫佢唔好講大話！」

「只係其中一個女友」

愈講愈勞氣的家強說：「都分手十世，唔好喺度扮未亡人！佢（林楚麒）知乜事，唔該佢，Please！（唔好利用家駒宣傳？）梗係唔好！佢哋分手年幾兩年，哥哥之後仲有兩個女朋友，佢（林楚麒）自己都知，仲要扮係我阿哥Last一個！邊係啫！叫佢唔好誤導歌迷！」他還大爆當年是因為林楚麒做了些對家駒唔住的事才分手，問到是否有第三者？他說：「唔講原因，我好憎佢！我阿哥憎佢，所以我憎佢，佢知乜事，叫佢唔好再講，夠喇！」至於有傳家駒與林楚麒曾訂婚，家強澄清：「依家我阿哥唔喺度，所以我代阿哥講，叫佢唔好話自己同阿哥訂過婚，攞隻訂婚戒指出嚟囉！佢只係阿哥其中一個女友！」至於林楚麒的電話轉駁至留言信箱，至截稿前仍未回覆。