案件前日判決後，崔建邦（Amigo）與鄺敏慧（中巴）分別接受無綫及有線訪問，無獨有偶安排於昨晚七時半的《東張西望》及《有錯．無罪》中播出。Amigo在節目中表示最近的心情已趨平和，沒有太大起伏，擔心的時間已過：「當時自己一個月冇出街，日日躲在家中，頭兩星期沮喪到冇食過嘢，只係飲水，家人好擔心，一直陪伴左右。頭一個月仲瞓唔到覺，每日都會扎醒打冷震，然後就去電腦睇吓新聞講我啲乜。」他坦言事發後有人雪中送炭，亦有一沉百踩，令他領悟不少。主持問到事件會否令他日後交女友造成心理障礙，Amigo說：「唔會，保護自己係需要，並唔係因為呢件事，我對人都充滿期望。」

唐詩詠出巡續封嘴

另一邊廂，中巴到有線與陳啟泰、可宜錄影節目後，隨即接受區永權的「獨家」訪問。區永權問到判決後，經過一晚心情如何？中巴語氣平靜地說：「都係專心工作。（有咩想講？）多謝大家關心，好多人想知我心情，大家想知嘅嘢，我會再出嚟講。（點解遲啲先交代？）我都唔清楚，今日淨係嚟工作，件事暫時唔想提。（之前講得太多，有人唔想你講咁多？）唔方便講，我係上嚟做嘢，冇預講私人事。」此外，被指與Amigo翻撻的唐詩詠，昨日冒雨跑到蘭桂坊附近一幢大廈。記者事後致電給她，她透露是為稍後的婚紗騷試衫，但對於有關Amigo的提問一概不回應。

歐陽靖唔怕冇得撈

而接替Amigo主持《勁歌金曲》的歐陽靖，昨日接受查小欣電台節目訪問。對於Amigo被撤銷控罪，他說：「咁恭喜佢囉！（怕佢返嚟冇得做？）唔擔心、唔驚亦唔介意，因為之前冇預過有得做，自己有冇得做同佢件事係兩回事。」無綫高層樂易玲指Amigo判決後，曾致電給她：「聽得出佢心情OK。（工作方面？）慢慢睇吓，有適合工作就會安排。」