李詩韻投資逾百萬元開設的化妝學校，上月底順利開張，不過剛榮升老闆娘的她未敢怠慢，完成新劇《公主嫁到》後連日來在新舖打躉，打點新舖事務，抹地打掃一腳踢，估計是無閒錢請人清潔，結果要做埋阿四！化妝學校原定投資80萬元，但首次創業的她，樣樣要做到最好，最終嚴重超支，要逾百萬才可埋單！為了開源節流，家境富裕的她都要放下身段，連瑣碎清潔事務都要親力親為！

入貨首要格價

日前，詩韻在舖內大清潔，她攞起地拖，頭耷耷抹地，雖然看來有點雞手鴨腳，抹地抹到好比寫大字般，不過她最後仍把地下抹到一塵不染。轉眼又見她走出舖倒垃圾，之後又急急折返舖內打點，忙到一頭煙！1小時後，身水身汗的詩韻要為舖頭添貨，急急換衫出動。她落街左逛右逛，經過一間髮飾批發店時，即被產品吸引，二話不說衝入舖格價，買了一個假人頭及一支腳架，最後自己搬番舖頭。期間她一手拿着化妝書，一手拿着戰利品及腳架，相當狼狽，沿途更被不少路人認出，為免出洋相，她只好低頭急急腳返回舖頭！

李詩韻凡事親力親為，連倒垃圾都不假手於人。

外表弱質纖纖的李詩韻，做搬運時格外令人擔心。

堅持親力親為

事後詩韻接受電話訪問時，坦承投資超支：「今次係我第一次做生意，特別緊張，好多嘢都想親自落手落腳做，好似由揀舖位、請人到買化妝品，我都會親力親為！總之有關舖頭嘅嘢，自己做到嘅，我都會自己做番！（連抹地都自己抹？）有乜所謂？都係舖頭嘅嘢嚟啫！」

放大圖片	甫入店內，李詩韻即變身格價專家，最後滿載而歸。